Memleket basshysy Nursultan Nazarbaev Alǵys aıtý kúniniń mańyzyn túsindirip berdi, - dep habarlaıdy «Qamshy» portaly Tengrinews.kz – ke silteme jasap.

"(...) Bir kúni barlyǵymyzdyń da túrimiz, shashymyzdyń túsi, kózimizdiń túsi birdeı bolyp shyǵa kelse she? Keremet qoı ıá? Biz barlyǵymyz bir-birimizge qatty uqsaımyz. Adamnyń aty adam, ol tańnan túske deıin qasynda otyrǵan adamnyń áıteýir bir kemshiligin tabady: durys otyrmady, jóteldi, qasyqty basqa qolmen ustady degendeı. Bul adamǵa tán qasıet. Al toleranttylyq adamnyń qandaı bolýyna qaramastan, oǵan qurmetpen qaraýdy bildiredi. Túsinesizder me? Eger sen adamnyń kemshilikterin jaqsy kórmeseń, ony shyn júrekten jaqsy kúrý múmkin emes deıdi. Biz sol kemshilikterdi jaqys kórmeımiz ǵoı", - dedi Prezıdent. 

"Toleranttylyq degenimiz - eger túske qaraı adamnyń kemshilikterin kórseń, ony jarıa etpeýdi, synamaýdy, tájikelespeýdi bildiredi. Ony túsin, qandaı bolsa da qurmette. Úndemeı qal. Túsinesizder me, erlik degenimiz qylysh alyp, jaýǵa attaný nemese bireýdi pyshaqtaý emes. Erlik degenimiz aıtqyń kelgendi ishte qaldyrý. Mine, bul naǵyz erlik. Eger osyndaı erlik bolsa otbasylarda tynyshtyq ornaıtyn edi, jastar úılene salyp ajyraspaıtyn edi, bir-birin túsiner edi. Adam qandaı bolsa da túsinistikpen qaraý, bir-birin jaqsartýǵa tyrysý, synamaý. Toleranttylyqty qarapaıym tilmen osylaı túsindirýge bolar edi. Biz barlyǵymyz, qazaqstandyqtar negizinde 75 paıyzǵa toleranttymyz, al qalǵan 25 paıyzyn biz tárbıelep jatyrmyz," - dedi Nazarbaev.

Qazaqstandyqtar búgin, 1 naýryzda tarıhta tuńǵysh ret Alǵys aıtý kúnin toılap jatyr. Ol bul merekeniń Qazaqstan qoǵamyndaǵy senim men dostyqty nyǵaıta túsetinine senimdi. Nazarbaev kóp elde qaqtyǵystardyń bolyp jatqanyn, sondyqtan qazir adamdardyń bir-birine qoldaýy úshin alǵys aıtýy qundy ekenin málimdedi.