Elbasy Nursultan Nazarbaev Qazaqstannyń áıelder qaýymy ókilderimen «kóktem shýaǵy» atty kezdesýinde elimizdegi barsha áıelderdi kele jatqan 8 naýryz - halyqaralyq áıelder kúnimen quttyqtady, - dep habarlaıdy «Qamshy» portaly Aqordanyń baspasóz qyzmetine silteme jasap.

Memleket basshysy elimizdiń qalyptasýy men damýyndaǵy áıelderdiń baǵa jetpes róline toqtala kelip, olarǵa densaýlyq, súıispenshilik, baq-bereke jáne tabys tiledi.

Nursultan Nazarbaev bıylǵy kezdesýge túrli kásip ıeleri qatysyp otyrǵanyna nazar aýdardy.

- Aralaryńyzda kópbalaly analar, bıznes ókilderi, áskerıler, ǵalymdar, dárigerler, pedagogtar, mádenıet pen sport qaıratkerleri, jýrnalıser bar. Áıelder Táýelsizdik jyldarynyń bárinde meniń eń senimdi tiregim boldy. 25 jyldaǵy barlyq jetistikterimiz sizderdiń belsene atsalysýlaryńyzdyń arqasynda ǵana múmkin boldy. Sizder bizdiń qoǵamdaǵy birliktiń, jasampazdyq pen turaqtylyqtyń beınesine aınaldyńyzdar, - dedi Memleket basshysy.

Qazaqstan Prezıdenti áıeldiń basty paryzy ana bolý ekenin atap ótti.

- Ananyń tárbıesi men mahabbatyn ásirese bala kezinde kórgen adam aman-esen ósip, jaqsy azamat bolady. 25 jylda 7 mıllıondaı kishkentaı qazaqstandyqtar dúnıege keldi. Elimizde árbir saǵat saıyn 45 nemese jylyna 400 myń bala týady. Osynyń bári bereke men erteńgi kúnge degen senimniń arqasynda bolyp otyr. Qazaqstannyń bolashaǵy - jańa urpaq.  Bıyl men balany qorǵaýdyń kepili retinde Qazaqstandaǵy bala quqyǵy jónindegi ýákil týraly jarlyqqa qol qoıdym.  Otbasy kúnin merekeleý jáne «Mereıli otbasy» jalpyulttyq konkýrsyn ótkizý dástúrge aınaldy, - dedi Nursultan Nazarbaev.

Memleket basshysy 1 naýryzda «100 naqty qadam» Ult jospary aıasynda Bilim men ǵylymdy damytýdyń 2016-2019 jyldarǵa arnalǵan jańa memlekettik baǵdarlamasyn qabyldaý týraly jarlyqqa qol qoıǵanyn aıtty.

- Baǵdarlamada jaqsy jańalyqtar az emes. Mektepte oqytýdyń memlekettik bilim standarttary álemdik standarttar negizinde jańartylady. Árbir túlek alǵashqy kásiptik biliktilikti tegin ıgerý múmkindigine ıe bolady. Biz balalardy mektepke deıingi oqýmen 100% qamtýǵa umtylyp otyrmyz. Kelesi jyldan bastap úsh tildi bilim berý isin birtindep engize bastaımyz. 2020 qaraı 12 jyldyq bilim berý júıesine kóshý qamtamasyz etiledi. Ǵalymdardyń boljamynsha, 2020 jylǵa qaraı jer júzindegi halyqtyń 50 paıyzyn «sıfrly balalar» quraıtyn bolady. Áńgime mektepterimizdi aqparattandyrý týraly bolyp otyr, 2019 jylǵa qaraı olardyń barlyǵy jyldam ınternetke qol jetkizýge tıis. Aqyry biz Ekonomıkalyq damý jáne yntymaqtastyq uıymymen yqpaldasyp jatyr ekenbiz, demek osyny da júzege asyrý kerek, - dedi Qazaqstan Prezıdenti.

Nursultan Nazarbaev sońǵy 10 jylda bala týǵanda beriletin járdemaqy - 6,3 ese, bir jasqa deıingi bala kútimi úshin járdemaqy 4 ese óskenine nazar aýdardy. Qazir kópbalaly jarty mıllıon otbasy memlekettik járdemaqy alyp otyr.

- Az qamtylǵan otbasylarǵa áleýmettik kelisimsharttar arqyly ataýly kómek berýge 1,5 mıllıard teńge bólinedi. Men qoǵamnyń, árbir otbasynyń amandyǵy tikeleı áıeldiń aman-saýlyǵymen baılanysty ekenin árdaıym aıtyp kelemin, - dedi Memleket basshysy.

Sońynda Qazaqstan Prezıdenti áıelderdi kele jatqan merekemen taǵy da quttyqtap, olardyń barlyq bastamalaryna tabys, ózderine mol shattyq tiledi.

Sóz alǵan áıelder qaýymynyń ókilderi óz jetistikteri týraly áńgimelep, júrgizilip jatqan áleýmettik-ekonomıkalyq saıasattyń oń yqpaldaryn atap ótti.

Memleket basshysy is-shara barysynda kópbalaly ana A.Toqpanovaǵa «Altyn alqa» tapsyrdy.

Kezdesýge Memlekettik hatshy, QR Prezıdenti janyndaǵy Áıelder isi jáne otbasylyq-demografıalyq saıasat jónindegi ulttyq komısıa tóraıymy G.Ábdiqalyqova, Parlament Senatynyń depýtaty B.Áıtimova, Ekonomıkalyq ıntegrasıa mınıstri J.Aıtjanova, «Astana EKSPO-2017» UK» AQ basqarýshydırektory M.Egimbaeva, sharýa qojalyǵynyń basshysy T.Qushmanova, Pedıatrıa jáne balalar hırýrgıasy ǵylymı ortalyǵynyń dırektory R.Boranbaeva, «Qazaq oıýlary» JSHS dırektory T.Elekbaeva, jıhaz fabrıkasynyń basshysy E.Levına, Qaraǵandy oblysyndaǵy «Murager» mamandandyrylǵan mektep-ınternatynyń dırektory M.Nurmaǵanbetova, «Qazaq qyzy» qoǵamdyq birlestiginiń tóraıymy Q.Ábden, ánshi T.Janqul, «Delovoı mır Astana» JSHS dırektory, bas redaktory  Sh.Syzdyqova, aqyn A.Dáýletbaeva, kópbalaly ana J.Baıjoldınova, «Astana Opera» teatrynyń solısi J.Ǵabdýllına, «Astana Balet» teatrynyń bas rejıseri M.Abýbahrıeva, bıolog ǵalym D.Qanaeva, aýyldyq okrýg ákimi P.Oralbaeva, «Otyrar sazy» Memlekettik akademıalyq fólklorlyq-etnografıalyq orkestriniń bas dırıjeri, aktrısa D.Tilendıeva, zymyrandy artılerıalyq keme áskerı bóliminiń radıo baılanysshysy J.Ybyraeva, Aqtóbe feroqorytpa zaýytynyń jóndeý-mehanıka sehynyń temir kesýshisi A.Kenesarına, Qostanaı oblysy, Sarykól aýdanyndaǵy «Jastar bastamasy ortalyǵynyń» basshysy E.Danılova, aýyr atletıkadan QR eńbek sińirgen sheberi J.Japparqul, aktrısa D.Baqtybaeva, stýdent L.Mıtrohına qatysty.