Atyraý turǵyny, alty balanyń anasy Sandýǵash İzbasova turmystyq qıyndyqtar saldarynan úsh balasyn qalalyq ınternatqa ótkizýge májbúr bolǵan, - dep habarlaıdy «Qamshy» portaly sn.kz – ke silteme jasap.

Atyraýlyq búldirshin Bekbol Jaqsybaevtyń bir ǵana armany bar. Ol óz anasymen jáne qalǵan bes baýyrymen bir shańyraq astynda ómir súrýdi Qudaıdan kúni-túni tileıdi. Materıaldyq jaǵdaıdyń tym aýyrlyǵyna baılanysty anasy Sandýǵash İzbasova úsh ulyn Atyraýdaǵy qalalyq ınternatqa ótkizip jibergen. Óıtkeni, ashtan óltirip alamyn ba dep qorqady.

Sandýǵashtyń kúıeýi osydan birer jyl buryn ómirden qaıtqan. Alty balamen jalǵyz qalǵan áıeldiń ne baspanasy, ne turaqty jumysy joq, avtobýstarda kondýktor bolyp jan baǵady. Qazir qala irgesindegi alaqandaı bir bólmeli jer úıdi jalǵa alyp turyp jatyr. Sońǵy ýaqytta tipti, isherge tamaq tappaı qalatyn kezder bolady deıdi ol. Sondyqtan úlken úsh balasyn ınternatqa ótkizýge májbúr bolǵan.

Kópbalaly otbasynyń osynaý aýyr taǵdyry kópshilikke beımálim bolyp qala berýi múmkin edi. Biraq, kishkentaı Bekboldyń "Qazaqstannyń birinshi arnasyna" jazǵan haty biraz adamnyń kóńiline muń túsirdi. Ol óz hatynda anasynan jáne ózge baýyrlarynan ajyrap qalǵanyn aıtyp, kópshilikten kómek suraǵan. Anasy Sandýǵash ta BAQ ókilderi arqyly halyqtan qol ushyn berýdi ótinip otyr. Óıtkeni, kópbalaly batyr ana jergilikti bılik ókilderinen ábden úmitin úzgen eken.

- Men jalǵyzbasty anamyn. Bir bólmeli kishkentaı úıdi jalǵa alyp turyp jatyrmyn. Balalarymdy asyraýǵa múldem jaǵdaıym joq, sondyqtan olardy ınternatqa ótkizýge májbúr boldym. Senseńizder, jaǵdaıym óte múshkil. Alatyn járdemaqymnyń teń jartysyn baspanaǵa tólesem, jartysy tamaqqa jetpeı qalady. Al, balalardy kıindirýge múldem jaǵdaı joq. Tym aýyr halde bolǵandyqtan amalsyz halyqtan kómek surap otyrmyn, - deıdi kópbalaly ana Sandýǵash İzbasova.

Sandýǵash kúıbeleń tirlikten bir sátke bosaı qalsa balalary jatqan ınternatqa shaýyp keledi. Biraq mundaı kúnder jıi qaıtalana bermeıdi deıdi ol. Ár kelgen saıyn keýdesine tyǵylǵan óksikti syrtqa shyǵarmaýǵa tyrysady eken. Óıtkeni, onsyz da jaltaqtap júrgen balalarynyń aldynda áıel myqty bolýy tıis. 

Sandýǵashtyń jergilikti bılikten úmitin úzýi beker emes. Ol buǵan deıin Atyraý qalalyq ákimdiginiń tabaldyryǵyn talaı tozdyrypty. Sondaǵy suraǵany baspana ǵana. Alaıda, úıdi tek kezekpen beretinin aıtqan sheneýnikter kópbalaly jalǵyzbasty anaǵa esh kómek kórsetpegen.

- İzbasova Sandýǵash úı kezegine kópbalaly ana retinde turdy. Qazir onyń kezegi 1982-shi, - deıdi Atyraý qalalyq TKSH sektorynyń mamany Radmıra Sısatova.

Iaǵnı, kezektiń jyljý qarqynyna qarasaq Sandýǵash aldaǵy 2-3 jylda baspanaly bola almaıdy.

Jesir áıel anda-sanda ınternattaǵy uldaryn úıine ákep, bala-shaǵanyń basyn qosyp turady. Biraq, mundaı kúnder óte sırek bolǵandyqtan onyń árbir mınýty altynmen teń.

- Ómirden túńilip ketemin. Biraq, myna alty balany jetildirý kerek, osylar úshin ómir súrip júrmin. Qatty janym qınalǵanda balalarymnyń kózine qarap, búkil sharshaýymdy basamyn, - deıdi S.İzbasova.

Jalǵyzbasty anaǵa kómekteskisi keletin jandar tabylyp jatsa Sandýǵashtyń uıaly telefonyna habarlasýyna bolady: 8 702 31 11 906.