Shymkent syra zaýytynyń 35 jumysshysy búgin ereýilge shyqty, - dep habarlaıdy «Qamshy» portaly.

Zaýyt basshylyǵyna narazylyq bildirýshiler ózderiniń úsh aıdan beri eńbekaqylaryn ala almaı otyrǵandaryn aıtady. Olardyń aıtýynsha, jalaqy boıynsha zaýyt ár jumysshyǵa orta eseppen 150-200 myń teńge qaryz kórinedi. Jumysshylardyń keıbiri zaýyt qojaıyny tutqyndalǵan soń, eńbekaqydan úmitin úzip, jumystan shyǵyp ketipti.

«Biz bar bolǵany eńbekaqymyzdyń tólenýin talap etemiz. Basqa eshteńe kerek emes. Qazir ótken jylǵy jeltoqsan aıy, bıylǵy qańtar, aqpan aılary úshin 35 jumysshy jalaqylaryn ala almady. Birazyn basshylyq aqysyz demalysqa jiberdi, keıbireýin jumystan shyǵardy. Al, keıbireýler óz erkimen jumystan ketti. Bizdiń barlyǵymyzdyń otbasymyz bar. olardy qalaı da asyraý kerek. Bizdiń talaptarymyzǵa oń kózqaras tanytýdy jáne adal eńbekaqymyzdyń tólenýin suraımyz», - deıdi kúzetshi bolyp jumys isteıtin Shalqar Baızaqov.

Alaıda, zaýyt basshylyǵy kúzetshilerge qatysymyz joq dep otyr. Kúzetshiler bolsa, ózderi jumys isteıtin «Vympel» kúzet fırmasy men syra zaýytynyń quryltaıshysy bir adam ekenin aıtýda.

Oqıǵa ornyna kelgen OQO boıynsha bas memlekettik eńbek ınspektory Bastar Esqaraev jumysshylardy sabyrǵa shaqyryp, olardyń aryzdaryn jınap alyp ketken.

B. Esqaraevtyń aıtýynsha, zaýyt osy ýaqytqa deıin jumysshylaryna 27 mıllıon teńge jalaqy qaryz bolyp kelgen. Bul soma búginde tolyq ótelgen kórinedi.

Esterińizge salsaq, zaýyt quryltaıshysy, belgili kásipker Toqtar Tóleshov aqpan aıynyń basynda qylmystyq kodekstiń birneshe baby boıynsha aıyptalyp, tutqynǵa alynǵan bolatyn.