Májilis depýtattyǵyna kandıdat usynǵan partıalar arasyndaǵy saıası pikirsaıys 16 naýryzda ótedi. Mundaı sheshim búgin QR Ortalyq saılaý komısıasynyń otyrysynda qabyldanǵan, - dep habarlaıdy «Qamshy» portaly QazAqparatqa silteme jasap.

«Qazaqstan Respýblıkasyndaǵy Saılaý týraly» Konstıtýsıalyq zańnyń 12, 27 jáne 28 baptaryna sáıkes  20 naýryzǵa taǵaıyndalǵan Parlament  Májilisi depýtattaryn saılaýǵa partıalyq tizimderin usynǵan partıalardyń saıası pikirsaıysyn uıymdastyrý týraly qaýly jobasyn nazarlaryńyzǵa usynamyn. Pikirsaıystyń «Habar» telearnasynda uıymdastyrylýyn jáne 2016 jylǵy 16 naýryzda ótkizý usynysyn engizemin», - dedi qaýly jobasymen tanystyrǵan QR OSK múshesi Lázzat Súleımen.

Sonymen qatar ol saıası pikirsaıys  ótkizý reglamentiniń jobasyn da usyndy.

«Saıası pikirsaıys Parlament Májilisi depýtattaryn saılaýǵa partıalyq tizimderin usynǵan saıası partıalardyń árqaısysynyń pikirsaıysqa qatysýǵa kelisimi boıynsha ótkizedi. OSK pikirsaıys úshin belgilengen efır ýaqytyn pikirsaıysqa qatysýǵa nıet bildirgen saıası partıalardyń arasynda teń jaǵdaıda bóletin bolady», - degen ol pikirsaıystyń 90 mınýttaq deıin sozylýy múmkin ekenigin atap ótti. 

QR OSK músheleri qaýly jobasyn biraýyzdan qabyldady.

Pikirsaıysqa qatysý úshin saılaýǵa qatysýshy árbir saıası partıadan bir ókilden shaqyrylady. Qatysýshylar jeke basty qaralaýdan, saıası partıanyń, onyń músheleriniń namysyna, abyroıy men iskerlik bedeline kórineý nuqsan keltiretin sóz aıtýdan, basqa saıası partıalardyń ókilderin kemsitýden aýlaq bolyp, jalpyǵa birdeı qabyldanǵan ádep normalaryn saqtaýǵa tıis.

Respýblıkanyń konstıtýsıalyq qurylysyn kúshtep ózgertýdi, onyń tutastyǵyn buzýdy, memleket qaýipsizdigine nuqsan keltirýdi, áleýmettik, násildik, ulttyq, dinı, tektik-toptyq jáne rýlyq arazdyqty qozdyrýdy, qatygezdik pen zorlyq-zombylyqqa bas urýdy, sondaı-aq zańnamada kózdelmegen áskerılendirilgen quralymdar qurýdy nasıhattaýǵa jáne úgitteýge jol berilmeıdi.