Búgin, 14 naýryzda Qaraǵandy qalasyndaǵy «Saryarqa» arnaıy ekonomıkalyq aımaqtyń aýmaǵynda alǵashqy qazaqstandyq patron zaýyty qurylysynyń bastalýyna arnalǵan rásim ótti, - dep habarlaıdy «Qamshy» portaly Qorǵany mınıstrliginiń baspasóz qyzmetine silteme jasap.

Oǵan qorǵanys mınıstri Imanǵalı Tasmaǵambetov pen «Qaztehnologıalar» AQ basqarma tóraǵasy Meder Maselov qatysty.  

Bul joba Qazaqstan Prezıdenti, Qarýly kúshterdiń Joǵarǵy Bas Qolbasshysy Nursultan Nazarbaevtyń tapsyrmasy boıynsha ázirlendi.

Ulttyq qaýipsizdiktiń qajetti deńgeıin qamtamasyz etý, qazaqstandyq ónimdi arttyrý, sondaı-aq atys qarýyna arnalǵan qolda bar patrondardyń qorynyń azaıtylýyn nazarǵa ala otyryp, QR Qarýly Kúshterinde anaǵurlym suranysqa ıe 5,45*39 mm, 7,62*54 mm, 9*18 mm, 9*19 mm kalıbrli patrondardy óndirý boıynsha zaýyt qurý josparlanýda. Osy joba sheńberinde «Saryarqa» arnaıy ekonomıkalyq aımaǵynyń aýmaǵynda ǵımarat kesheni men patrondyq zaýyttyń qurylysyn salý josparlanýda. Arnaıy ekonomıkalyq aımaqtyń aýmaǵynda barlyq ınjenerlik komýnıkasıalar, avto jáne temirjol kóligi bar. Bul ortalyqtandyrylǵan túrde alańnan tys ınjenerlik magıstraldarǵa ishki alańdyq jelilerdi qosý, sondaı-aq Qazaqstannyń kez-kelgen óńirine qarý-jaraq qoımalaryna avtomobıldi jáne temirjol kóligimen ónimdi shyǵarýdy júzege asyrý múmkindigin beredi. Qurylystyń jalpy aýdany 26 400 sharshy metrdi quraıdy. Qurylys jumystaryn aıaqtaý 2017 jyldyń jeltoqsan aıyna josparlanǵan.

«Patron zaýyty uzaq jyldar boıy el ishinde shıkizat pen materıaldar tasymaldaýǵa suranysty turaqty qamtamasyz etedi. Jez sıaqty qorytpanyń 300 tonnasyn qoldaný aımaqtaǵy mamandandyrylǵan kásiporynnyń jumysyn jandandyrady. Arnaıy ekonomıkalyq aımaq tártibi jaǵdaıynda da qazaqstandyq patron zaýyty salyq túrinde óńirdiń búdjetine jylyna 680 mln teńge qarjy túsiredi. Bul bizdiń eń qarapaıym boljam» - dep atap ótti «Kaztehnologıı» AQ basqarma tóraǵasy Meder Maselov.

Atalǵan óndiristiń jumysy Qazaqstannyń uzaq merzimdi atys qarý-jaraǵynyń oq-dárilerin óndiretin elder qataryna enýine múmkindik beredi. Qazirdiń ózinde «Kaztehnologıı» AQ zaýyt ónimin eksporttaý boıynsha kelissózder júrgizýde. Atap aıtqanda, «Kadex-2016» kórmesi aıasynda ár túrli memleketterge ónim jetkizý jóninde kelisimge qol qoıý josparlanyp otyr.

Qazirgi ýaqytta Qazaqstan Respýblıkasynda atys oq-dárileri shyǵarylmaıtynyn aıta keteıik. Bul rette Qorǵanys mınıstrliginiń muqtajdyǵy úshin aǵymdaǵy patrondardaǵy qajettilik KSRO-nyń quldyraýyna deıin qurylǵan qorlar esebinen jabylady. Qazaqstan Respýblıkasynyń Qarýly Kúshterin oq-dárilermen qamtamasyz etý úshin qazaqstandyq shıkizat pen materıaldar paıdalanylady. Bul jetkizýshi elderden táýelsiz bolýǵa múmkindik beredi. Qazaqstan Respýblıkasy Qarýly Kúshteriniń oq-dárilermen qamtamasyz etilýi jalpy alǵanda, eldiń jáne óńirdiń áskerı-saıası qaýipsizdigin arttyrady. 

Patrondardy óndirý boıynsha jabdyqty kanadalyq Waterbury Farrel kompanıasy jetkizetin bolady. Qazaqstandyq patron zaýyty óndirý qýattylyǵy jylyna 30 mln. danany quraıtyn patrondardy shyǵarýǵa arnalǵan ozyq quralmen jabdyqtalady. Tehnologıalyq jabdyq ınovasıalyq tehnologıalardy qoldana otyryp, álemdik sapa standartyna sáıkes keledi.  Qurastyrý jáne iske qosýdy daıyndaý jumystary 2017 jyly ótedi. Montajdaý jumystary óndiristik personaldy oqytýmen biriktiriledi.  Jańa 164 jumys orny qurylady. Osylaısha, aýqymdy maqsatta qoldanylatyn oq-dári shyǵarý boıynsha klaster qurý josparlanýda.