Qazaqstanda sheneýnikter men polısıa qyzmetkerlerine smartfon paıdalanýǵa tyıym salyndy, - dep habarlaıdy «Qamshy» portaly.

İshki ister mınıstri Qalmuhanbet Qasymov mundaı shekteýdi polısıa kúzetetin organdardyń sheshimi dep túsindirgen.

Birqatar aqparat quraldary bul shekteý Astana qalasynda jaýyzdyqpen óltirilgen stýdent Erasyl Áýbákirovtyń máıiti túsirilgen fotolardy polısıa qyzmetkerleri áleýmettik jelilerge jarıalap jibeýimen baılanystyrǵan bolatyn.

«Munyń atalǵan oqıǵaǵa qatysy joq. Bul biz kúzetetin mekemelerdiń sheshimi. Al, ana jaǵdaı (E. Áýbákirovtiń sýretiniń tarap ketýi – red.) shynymen jaqsy nárse emes. Bizdiń jedel qyzmetkerler qyzmette qoldanylmaıtyn quraldardy paıdalanǵan. Olardy jazaladyq», - degen Q. Qasymov ózi qarapaıym «Nokıa 8800» markaly qalta telefonyn ustaıtynyn aıtqan.

Áleýmettik jeli qoldanýshylary memlekettik mekemeler men túrli kásiporyndarǵa ortalyq bılik organdarynan smartfondardy paıdalanýǵa shekteý qoıý týraly qyzmettik hattar túsip jatqanyn aıtýda.

Rejımdik mekemeler men qupıa qujattarmen jumys isteıtin qyzmetkerlerdiń aqparat taratý quraldaryn paıdalanýyna shekteý qoıatyn nusqaýlyqtar men erejeler burynnan bar. Al, keıbir qyzmetkerler men basshylardyń salǵyrt-salaqtyǵy úshin zamanǵa saı baılanys quraldaryna jappaı tyıym salý adam quqyn shekteý bolyp sanalmaı ma? Ol jaǵyn ashyp aıtqan eshkim joq.