Kásipqoı boksshy Qanat Islam Rıo Olımpıadasyna qatysý týraly oıyn bildirdi, - dep habarlaıdy «Qamshy» portaly oishogyr.kz – ke silteme jasap.

Boksshy jýrnalıs Berik Sultannyń suraǵyna qazir AQSH-ta jattyǵý jasap jatqanyn, sáýir aıynda kezekti kezdesýi ótetinin aıtqan.

«Eldiń yqylasyna, qoldaýyna rahmet. Meni izdeıtin qazaǵymnyń baryna shúkir. Eldiń yqylasy jeńiske jetýime senim uıalatyp, serpin beredi. Qazir men AQSH-ta kelesi jattyǵýyma daıyndalyp jatyrmyn. Buıyrtsa jekpe-jek kelesi aıdyń segizine dep josparlanýda. Árıne men úshin olımpıadanyń orny bólek. AQSH-ta da kók týdy jelbiretý úshin júrmin ǵoı. Biraq olımpıada oıyndarynda ánurandy oınatý ol bólek nárse. Ol bólek qýanysh. Qazir meniń salmaǵymda Danıar Eleýsinov, Jánibek Álimhanuly inilerim óner kórsetip júr. Ekeýi de jaqsy jigitter. Olar boks áleminiń jaryq juldyzyna aınalatynyna senemin. Tilekshimin. Shynymdy aıtsam, sol eki inimniń jolyn keskim kelmeıdi. Árıne, mańdaıǵa jazǵany bolady. Eger, Qanat olımpıadaǵa eldiń atynan sen barýyń kerek dese, men daıynmyn. Bárin tastap barýǵa ázirmin. Bıylǵy doda óte tartysty bolmaq, olımpıadada óner kórsetetin baýyrlaryma tek sáttilik tileımin. Kók týdy jelbiretip, el qorjynyna kóp altyn salady dep senemin», - deıdi Qanat Islam.

Esterińizge salsaq, Áýesqoı boks qaýymdastyǵy (AİVA) kásipqoı boksshylardyń da Rıoda ótetin Olımpıadaǵa qatysýyna ruqsat bergen bolatyn.