Saılaý ótken soń, Májiliske jańadan saılanǵan depýtattar Astanadaǵy bes juldyzdy qonaq úılerge jaıǵasatyn kórinedi. QR Parlamentiniń sharýashylyq basqarmasy depýtattarǵa arnalǵan memlekettik turǵyn úı qoryn «jańa turǵyndarǵa» úlestirgenge deıin osyndaı ýaqytsha qadamǵa barmaq. Atalǵan basqarmanyń qonaq úı qyzmetine ashyq memlekettik satyp alý baıqaýyn jarıalaǵanyn ratel.kz saıty jazyp otyr.

Jalpy quny 169 713 392,86 teńge bolatyn konkýrstyń jeńimpazy da belgili bolypty.

«Hattamada jazylǵandaı «Solaks» kompanıasy konkýrs jeńimpaz atalyp otyr», - degen Parlamentiniń SharBas (Sharýashylyq basqarmasy) zań qyzmeti  jáne memlekettik satyp alýlar basqarmasynyń bastyǵy  Baqádil Qonqashov.

Jeńimpaz kompanıa «halyq qalaýlylaryna» 3,5 paıyz jeńildik usynyp, sol arqyly konkýrsty utyp alǵan kórinedi.

«Sý jańa depýtattar» saılaýdan soń «Solaks» kompanıasynyń qaramaǵyndaǵy Soluxe Astana (Beijing Palace) qonaq úıine jaıǵaspaq.

Qonaq úı basshylyǵy meımanhanalarynyń joǵary talaptarǵa saı ekenin aıtqan.

«Biz demalýshylardyń jany da, táni de rahat tabatyn jaǵdaılar jasaımyz. SPA ortalyqta demalyp, qytaı asqanasynan dám tatý múmkindigin usynamyz. Bizdiń qonaq úıdiń 23-qabatynda ornalasqan, aınalyp turatyn meıramhanamyzdan depýtattar búkil Astanany baqylap otyryp, as ishý múmkindigine ıe bolady. Qytaılyq aspazdar qonaq túı klıentterine qytaı asqanasynyń barlyq tátti-dámdisin usynady», - depti ondaǵylar.

El arasynda «Pekın Palas» atalyp ketken qonaq úı nómirleri dybys ótkizbeıtin qasıetterimen de tanymal ekendigi aıtylýda.

Sonymen, depýtat bolý baqyty buıyrǵan qalaýlylar atalǵan qonaq úıdiń árqaısysynyń aýdany 35 sharshy metrden bastalatyn 107 nómirine jaıǵasady. ratel.kz osylaısha qonaq úıdi tolyqtaı depýtattar jaılaıtynyn jazýda. Basylymnyń habarlaýynsha mundaǵy nómirlerdiń baǵasy táýligine 118 800 teńgeden bastalatyn kórinedi.

Atalǵan qonaq úıdiń Qytaı ulttyq munaı kompanıasynyń (CNPC) «Hýa Ioý» enshiles kompanıasyna tıesili ekenin aıta ketý kerek.

Ázirlegen: Darhan Muqantegi