QR Qorǵanys mınıstrligi men UQK qyzmetkerlerine qatysty ótken jyly jemqorlyq sıpattaǵy 50 shaqty qylmystyq is qozǵalǵan, - dep habarlaıdy «Qamshy» portaly Kazpravda.kz – ke silteme jasap.

Bul týraly qorǵanys mınıstrliginde jemqorlyqqa qarsy is qımyl jónindegi Ulttyq búro bastamasymen ótken selektorlyq jıynda búro tóraǵasynyń orynbasary Alık Shpekbaev málimdedi.

«Ótken jyly Qarýly kúshter, UQK Shekara qyzmeti jáne İİM Ulttyq ulanynyń laýazymdy tulǵalaryna qatysty 49 jemqorlyq qylmys tirkeldi. Olardyń 38-i, ıaǵnı 78 paıyzy aýyr jáne asa aýyr sanattaǵy qylmystar. 44 tulǵaǵa qatysty tergeý júrgizildi», - deıdi áskerılermen jemqorlyqpen kúres jaıyn sóz etken A. Shpekbaev.

Jemqorlyqpen kúresker sheneýniktiń aıtýynsha, jemqorlyq qylmystar kóbinese memlekettik satyp alýlar salasynda, qorǵanys isteri jónindegi basqarmalar (áskerı komısarıattar) men bilim berý mekemelerinde (áskerı mektepter, t.b.) jıi oryn alatyn kórinedi.

Alaıda, A. Shpekbaev myrza Qorǵanys mınıstrliginde aldyn alý sharalarynyń nátıje berip otyrǵanyn aıtqan. 2014 jylmen salystyrǵanda byltyr bul bul vedomstvoda jemqorlyq qylmystar sany 21 paıyzǵa (34-ten 27-ge) qysqarǵan.

«Jalpy el boıynsha jemqorllyqqa qarsy áreketterdiń ósý qarqyny baıqalady. Muny azamattar men sarapshylar pikiri negizinde jasalatyn halyqaralyq reıtıńter rastap otyr», - deıdi A. Shpekbaev.

Áskerılerge jemqorlyq qylmystyń qyr-syry týraly túsindirgen A. Shpekbaev buryn isti bolyp qolǵa túsken, kinásin moıyndap, ókingen, túzeý mekemelerinde jazasyn ótep jatqan áskerı qyzmetshiler týraly beınerolıkter men derekti fılmder kórsetti.

Jıyn barysynda búro basshysynyń orynbasary jemqorlyqqa qarsy is-qımyl jónindegi Ulttyq búro atalǵan qylmyspen aıaýsyz kúresetinin jáne jazadan qutylýdyń múmkin emestigine nazar aýdartty. Jıynǵa Qorǵanys mınıstrliginen basqa, ásker túrleri men tekteri Basqolbasshylarynyń, qolbasshylarynyń orynbasarlary, óńirlik garnızondardaǵy basqa da áskerı bólimder men qurama komandırleri qatysqan.

Ázirlegen: Darhan Muqantegi