M.Áýezov atyndaǵy Qazaq memlekettik akademıalyq drama teatry 4-6 sáýir aralyǵynda Oral qalasyna gostroldik saparǵa attanady, - dep habarlaıdy «Qamshy» portaly.

 Teatrymyzdyń dırektory, QR eńbek sińirgen qaıratkeri Erlan Bilál bastaǵan teatr ujymy QR halyq artısi, Oral óńiriniń týmasy Gúlnar Jaqypovanyń qatysýymen qoıylatyn 3 spektákldi Batys Qazaqstan oblystyq drama teatrynda sahnalamaqshy. Atap aıtqanda,  4 sáýir Serik Asylbekulynyń «Imperıadaǵy kesh» dramasy, 5 sáýir Túnjer Jújenoǵlynyń «Kóshkin» áfsanasy (aýd. O.Qyıqymov), 6 sáýir Ǵarıfolla Esimniń «Tańsulý» dramasy. Bastalýy – 18:30. Atalǵan spektáklderdiń rejıseri – Qazaqstannyń eńbek sińirgen qaıratkeri Alma Kákisheva.

 «Imperıadaǵy kesh» – S.Asylbekulynyń búgingi kúnniń shyndyǵyn búkpesiz baıandaǵan shyǵarmasy. 2013 jyly Aqtóbe qalasynda T.Ahtanovtyń 90 jyldyǵyna arnalǵan Qazaqstan drama teatrlarynyń HHİ Respýblıkalyq festıvalinde «Búgingi zaman taqyrybyn sátti ıgergeni úshin» atalymymen marapattalyp, laýreat atalǵan qoıylym ekenin eske sala ketken jón. Spektáklde Aıdar esimdi kásipker arqyly bılik pen mánsaptyń, kókala qaǵazdyń sońyna túsip, bul ómirdegi gýmanısik qasıetterden alshaqtaǵan jandardyń shynaıy bet-beınesi ashylady. Avtor S.Asylbekuly: «Men halyq-aǵartý, bilim berý salasynda isteımin. 2001 jyldan beri  on tórt jyl boldy, joǵary oqý oryndary júıesinde qyzmet etip júrgenime. Ártúrli qyzmet istedim, aǵa oqytýshy, dosent, profesor boldym. Ýnıversıtettegi adamdardyń, ustazdardyń minez-qulqyn, ádet-saltyn, ómirlik ustanymdaryn biraz biletindeı tájirıbem bar, sol negizde jazdym», – deıdi.

Al, «Túriktiń Chehovy» atanyp ketken Túnjer Jújenoǵlynyń «Kóshkin» qoıylymynda apatty aımaqtaǵy aýyl adamdarynyń ómiri sýretteledi. Bul – jurtqa tóngen apat týraly ǵana emes, adam sanasyndaǵy úreıden arylý qajettiligin kórsetetin pesa. Úreılenip – úndemeý. Dybys shyqsa, kóshkin júredi degen úreımen jyldyń toǵyz aıyn únsizdikpen ótkizgen taýly aımaqtaǵy shaǵyn qystaqta ómir súretin adamdardyń qorqynyshy...

«Tańsulý» – qazaqtyń qasıet degen sóziniń bir formasy» dep Alma Kákisheva aıtqandaı, sulýlyǵyn namysy, eli, urpaǵynyń amandyǵy úshin tárk etken, shamamen Tóle bı zamanynda ómir súrgen batyr áıeldiń erligi Ǵ.Esimniń shyǵarmasy arqyly tarıh betine tússe, A.Kákishevanyń rejıserligimen qarashańyraq sahnasynda qoıylyp, synshylardyń joǵary baǵasyna ıe boldy jáne kórermen qaýymnyń kózaıymyna aınaldy. Osy oraıda,   burynǵy, qazirgi zamandy jáne bolashaqty toǵystyrǵan vıdeojoba, golografıa qoldanýǵa beıimdiligi arqasynda qazaq sahnasyna tyń senografıalyq serpilis ákeldi. Jetigen men dombyra oınaıtyn daryn ıesi, qazaq qyzdarynyń qaıtpas qaısar rýhyn, ór minezdiligin jańǵyrtqan Tańsulý beınesinde – teatrymyzdyń aktrısasy Ajarlym Baqytjanova. «Áıel zatyna sulýlyq baqytqa qosa qasiret ákeledi, báıbishe, balanyń joly kúnshyǵysqa da, kúnbatysqa da bastap tur. Anyq-qanyǵyn meniń qumalaqtarym asha almaı, qınalysta otyrmyn. Baıqaımyn, balańyz óziniń aldaǵy ómirin óńinde kórip, boljaǵanǵa uqsaıdy. O, ǵajap, mundaı da bolady eken-aý!» degen ultymyzdyń umytylǵan, tarıh qatparynyń qupıa jadynda saqtalǵan baqsynyń sózinen-aq, qoıylymnyń bet alar baǵyty ańǵarylǵandaı. Osyndaı jaýapkershiligi zor roldi moınyna alǵan  G.Jaqypova qoıylymmen bite qaınasyp, sabaqtasa órilgendeı.

Qurmetti óner súıer qaýym, 90 jyldyq tarıhy bar, qazaq teatr óneriniń alǵash irge tasy qalanyp, shymyldyǵy ashylǵan, KSRO jáne Qazaqstannyń halyq artıseri, QR eńbek sińirgen qaıratkerleri eńbek etetin óner ordasynyń Oral qalasyndaǵy Batys Qazaqstan oblystyq drama teatrynda sahnalanatyn qoıylymdaryn jiberip almańyzdar!