Naýryz meıramy – barlyq qazaqstandyqtar úshin táýelsiz memleketimizdiń qalyptasýymen birge jalpy halyqtyq súıikti merekege aınalǵan.

Kóktemniń osy bir shýaqty kúni qarashańyraq QazUÝ alańynda “Keremet” stýdentterdi qoldaý ortalyǵynyń uıymdastyrýymen Ulystyń uly kúni – Naýryz meıramy ótti. Merekelik is-shara Qydyr atanyń aq batasymen ashyldy. Shara barysynda  ál-Farabı atyndaǵy QazUÝ rektory Ǵalymqaıyr Mutanuly:

“Elimizge bereke-birlik, árbir januıaǵa baqyt, jaqsylyqtar tileımiz. Búgin mereke qarsańynda alańnyń ashylýy barlyǵy da sizder úshin. Aldaǵy ýaqytta alańǵa at beriledi. Búgingi mereke tek qana basy. 16 sáýir kúni syrtqy ister mınıstrligimen álemdik deńgeıde Naýryz meıramyn atap ótemiz dep josparlap otyrmyz. Árbir merekelik jıyndarda basymyzdy qosatyn kıeli úlken qarashańyraq QazUÝ jasaı bersin! ”, – degen aq tilegin arnady.

Merekelik jıynǵa oqý ordasynyń barlyq  fakúltet, kafedra basshylary, oqytýshylar men stýdentter jáne arnaıy shaqyrtylǵan qonaqtar qatysty. Merekelik jıynda kıiz úı de tigilip, dastarhan jaıylyp, ulttyq oıyndar men ásem ánder de shyrqaldy. Jataqhana stýdentteriniń arasynda “Shildehana”, “Betashar, sálem salý”, “Quda tabaq”, “Tusaý keser” syndy ulttyq salt-dástúr túrlerinen kórinister kórsetildi. “Tusaý keser” dástúrin kórsetý barysynda bilim ordasynyń rektory Ǵalymqaıyr Mutanuly: “Baqytty, damyǵan, kórikti elimizdiń aldyńǵy qatarly azamaty bolsyn! Sabyr bala ata-anasynyń, áýletiniń kóz qýanyshy, qazaq eliniń maqtanyshy bolsyn!”, – degen tilegin arnap, Sabyr atty balanyń tusaýyn ala jippen kesti.

Sondaı-aq, jastar arasynda “Arqan tartys”,  “Buqa tartys”,  “Kúres”,  “Gir kóterý”, “Toǵyzqumalaq”, “Qol kúrestirý” oıyndarynan saıys ótkizilip, nátıjesinde hımıa fakúltetiniń 1-kýrs magıstranty Ersin Káribaev I oryn, bıologıa fakúltetiniń stýdenti Beısen Qumar II oryn jáne III oryndy Smaǵul Jaqsylyq ıelendi. Sonymen qatar, toǵyzqumalaq oıynynan hımıa, bıologıa fakúltetiniń stýdentteri  Altyngúl Naǵymanova, Álipuly Ámir, Aınur Moldahmetova júldeli oryndarǵa ıe boldy.

“Jalpy naýryz merekesinde ulttyq oıyndardan saıys jyl saıyn uıymdastyrylady. Oıyn óte keremet, qyzyqty ótti. Bul saıysqa stýdent jastarmen qatar oqytýshylar, qonaqtar da qatysady. Oıyn nátıjesinde júldegerler baǵaly syılyqtarmen marapattalady,” – deıdi toǵyzqumalaqtan sport sheberi Aınur Shaharqyzy.

Merekelik is-shara barysy óner juldyzdary Ǵadilbek Janaı, Beıbit Kýshkalıev, “Jeti”  toby jáne stýdent jastardyń án shashýyna ulasty.

Túsinistikti tý etip, bereke men birlikke, adamgershilik pen ımandylyqqa úndeıtin naýryz meıramy Otanymyzǵa qut-bereke, halqymyzǵa ıgi jaqsylyq, árbir shańyraqqa shattyq pen baqyt ákelsin! Ulys oń bolsyn, aǵaıyn!

Zarına Toqtarova