Aqyn, «Qazaq úni» respýblıkalyq gazetiniń prezıdenti Qazybek Isa men jýrnalıs, «Aq jol» partıasy ortalyq komıtetiniń hatshysy Arman Sqabyluly «Aq jol» partıasynyń depýtattyq mandattardy bólý týraly sheshimine narazylyq bildirdi, - dep habarlaıdy «Qamshy» portaly.
Portal oqyrmandarynyń nazaryna qos qalamgerdiń málimdemeleri men partıa jıynynda sóılegen sózderin usynamyz.
Qazybek ISA: ULTYŃDY SÚIGENİŃ ÚSHİN KESHİRMEITİN ZAMAN BOLYP TUR!..
Qazir opozısıalyq baǵytyń bolsyn, oı-pikir qaıshylyǵyń , qandaı qarsylyǵyń bolsa da, keshirýge bar, tek ULTTYQ USTANYMYŃ ÚSHİN, ULTYŃDY SÚIGENİŃ ÚSHİN KESHİRMEITİN ZAMAN BOLYP TUR. Alash arystary kezinen kele jatqan bul qasiret sol Alashtyń armany bolǵan TÁÝELSİZDİKKE SHIREK ǴASYR TOLSA DA, ÁLİ KETPEI TUR EKEN… Bir tańqalarlyǵy, paryqqa da, paıymǵa da syımaıtyn paradoks – Alash zamanynda ulttyq ustanymǵa otarlaýshy el Keńes ımperıasy qarsy bolsa, qazir Táýelsiz elimizde óz qolymyz jetken óz bıligimiz, óz memleketimiz qarsy bolyp otyr. Iaǵnı, qanshama jyl kıgen quldyq qamytymyz sheshilgenine 25 jyl bolsa da, quldyq sanadan qutylmaǵan ekenbiz…
Halyqtyń sózin sóılegeni úshin Halyq jaýy qylatyn zamandy qoldan jasaǵandar, el men elbasynyń arasyna altyn kópir bolýdyń ornyna, qarabastarynyń qamy úshin qytaı qorǵanyn ornatyp otyrǵandar da ketedi erteń. Olardyń qazaqtyń qamyn jasaýdyń ornyna, qastyq jasap kelgenderin erteń tarıh taıǵa tańba basqandaı etip áshkereleıtin bolady. Bul tabıǵı da, tarıhı da zańdylyq. Qyspaqqa salǵan qytymyr qystyń ketkisi kelmeýi múmkin…, Kókaraı Kóktemniń keshigýi múmkin, biraq kelmeı qoımatyny qandaı aqıqat bolsa, bul Ulttyq Jańarýdyń da kelmeı qoımaıtyny sondaı aqıqat. Tek sol kóktemniń, sol jańarýdyń tym keshigip kelýi kóp kesepatyn tıgizetini qıyn-aq… Kóktem keshikse, jańarý kesheýildeı berse, eski shirı beredi… Biraq bıyl Astanaǵa kóktem jyldaǵydan erte keldi. Endeshe, kóp keshikpeı Naýryzdaı naǵyz Jańarý da jetedi dep senemiz! Jańarýdyń jarqyn belgisi -Jańa jyldaryńyz – Naýryzymyz qutty bolsyn! Jańa jylda ár azamattyń aldynan Aq jol ashylsyn!
“Aq jol” partıasyndaǵy áriptesterimdi bir atanyń balasyndaı baýyrlasyp ketkenimiz úshin qadirleımin. Bıylǵy alalyǵy az emes alamandy árqaısymyz, basshymyz bar, qosshymyz bar, júrgizýshilerimizge deıin júgirip júrip, kún demeı, tún demeı shapqylap ótkizdik. Partıaǵa bul joly eshqandaı ókpem joq. Ótken saılaýda bolǵan daýlardy “Er shekispeı , bekispeıdi” degendeı, basarazdyqtyń basyn ashyp, ustanymdarymyzdy aıqyndap alǵanymyz bar. Qazir bárimiz bir-birimizdiń betimizge tik qaraımyz dep oılaımyz. Eshqandaı partıaǵa múshe bolmaı, osy partıanyń basynan beri otyna kúıip, sýyǵyna tońyp kelemin. Partıanyń Parlamentte bolǵan burynǵy quramy tóraǵadan basqasy túgel jańarýy kerek edi… Partıaǵa halyq bergen mandatty eshkim jekeshelendirip almaýy kerek. Áıtpese, partıanyń jumysyn istep otyrǵansha, joǵarymen jumys isteý kerek eken ǵoı degen oı týyp jatyr. “Aq jol” óz tizginin ózi ustaı alatyn, óziniń sheshimin ózi shyǵaratyn, óz jolyn ózi aıqyndaıtyn «Aq jolǵa» aınalsyn! “Aq jolǵa” árdaıym Aq jol tileımin.
Sheneýnikterdiń sheshimine emes, Halyqtyń shyn qalaýyna qarap qýat alamyz!
Qazybek ISA,
Arman SQABYLULY: Jańa quramda ulttyq múdde úshin qaırat kórsetip júrgen qaıratkerler nege joq?
“Aq jol” partıasyna kelgende, ustanymymdy aıqyndap alǵanmyn. Ol partıanyń da baǵdarlamasynda bar ulttyq múdde máselesi. Men myna Parlament depýtattyǵyna usynylǵan jańa tizimdi qarap otyryp, partıadaǵy elge tanymal, ult úshin, memlekettik til úshin janyn salyp qaırat kórsetip júrgen azamattardyń atyn kóre almaı, daǵdaryp otyrmyn. Jańa saılaý bastalǵaly jańarý kútip, el eleńdeı kútken esim – qaıratker aqyn Qazybek Isa nege joq? Alash murasyna adaldyq tanytyp júrgen ǵalym Qaıyrbek Kemeńger de tizimde bolsa, jarasar edi… Kelesi saılaýda osy másele basty nazarda bolýyn qalaımyn. Sondyqtan myna Ortalyq Keńes plenýmyndaǵy daýys berýde men qalys qalamyn.
Qalaı desek te, biz “Aq joldyń” baǵdarlamasyndaǵy Alash armany, ulttyq múdde jolyndaǵy maqsattarymyz úshin kúrese bilýimiz kerek. Óz sheshimimizge ózimiz berik bolýǵa tıispiz. Myna jańa quramdaǵy depýtattardyń osyny myqtap qolǵa alýy kerek dep bilemin.
Arman SQABYLULY,
“Aq jol” partıasy OK hatshysy,
(“Aq jol” partıasy plenýmynda sóılegen sózi)
Pikir qaldyrý