Sanatyna sáıkespeıtin baspanalardy jarnamalap satýǵa tyıym salynady.  Búgin Senatyń jalpy otyrysynda «Qazaqstan Respýblıkasynyń keıbir zańnamalyq aktilerine tutynýshylardyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda Ulttyq ekonomıka mınıstri Erbolat Dosaev osylaı málim etti, - dep habarlaıdy «Qamshy» portaly QazAqparatqa silteme jasap.

Zań jobasyna sáıkes, turǵyn úılerdi satý úshin jobalyq qujattamasyna jáne turǵyn úıdiń klassıfıkasıasyna sáıkespeıtin jyljymaıtyn múlikti jarnamalaýǵa tyıym salynady. Osyǵan oraı depýtattar túsinikteme berýde jáne ol úshin jaýapkershilikti suraǵan bolatyn.

«Jarnamada turǵyn úılerdi satýda «ekonom klass, premıým, lúks» degen sekildi uǵymdar kóp. Qazirgi kúni qurylys salý normalary men erejelerine sáıkes, bizde turǵyn úıler tek tórt topqa jikteledi. Sonymen qatar, úı satyp alǵan tutynýshylar múlikti ıelengen soń baspananyń sanaty sáıkespeıtinin aıtyp jıi shaǵymdanady. Osyǵan baılanysty Elbasynyń tapsyrmasyna sáıkes, jarnamalar arqyly tutynýshylardy adastyryp, jańylystyrýǵa jol berilmeıtin bolady», - dedi E. Dosaev.

Onyń aıtýynsha, qurylys salý normalary men erejelerine osyǵan baılanysty ózgerister engizilmek. Qurylys normalarynda turǵyn úıdiń sanaty da jazylatyn bolady. «Zań kúshine engennen soń ondaı normalardy buzǵan qurylys kompanıalaryna qatysty sotqa shaǵymdanýǵa bolady. Eger sanatyna sáıkespeıtin bolsa, onda qurylys kompanıasynyń jarnamasyn toqtatýǵa qatysty sharalar da qoldanylady», - dedi mınıstr.