Qazaqstan Respýblıkasy Qarýly Kúshteri Joǵarǵy Basqolbasshysy N. Nazarbaevtyń tapsyrmasymen 27 naýryz kúni túngi saǵat birde dabyl soǵylyp, Jambyl oblysyndaǵy áskerı bólimder jaýyngerlik ázirliktiń joǵary deńgeıine keltirildi, - dep habarlaıdy «Qamshy» portaly Qorǵanys mınıstrliginiń baspasóz qyzmetine silteme jasap.
Atalǵan áskerı shara barysynda qorǵanys vedomstvosynyń basshysy Imanǵalı Tasmaǵambetov 03811 (Qulan aýyly), 91678 (Baýyrjan Momyshuly aýyly), 85395 (Taraz qalasy) áskerı bólimderiniń jáne «Teris-Ashybulaq» polıgonynyń jaýyngerlik ázirligi men qabilettiliginiń deńgeıin tekserdi.
Bul bólimsheler belgilengen ýaqyt merziminde «Teris-Ashybulaq» polıgonyna jınalyp, qoıylǵan mindetterdi oryndady. Sondaı aq, jyljymaly basqarý pýnkti, baılanys jelisi jáne basqa da qurylymdar ornatyldy.
85395 áskerı bóliminde (Taraz qalasy) tekseristiń qorytyndysy shyǵarylyp, onda bólimderdiń jınaqylyǵy men utqyrlyǵy jáne olardyń belgilengen ara-qashyqtyqty jedel eńserý múmkindigi tekserildi. Kenetten tekseristiń basty maqsaty áskerı bólimder men onyń qurylymdarynyń tótenshe jaǵdaılar, lańkestik áreketter qaýpi tóngende jáne oryn alǵan kezdegi úılesimdi áreketin baǵalaý, sýly jáne taýly aýmaqtaǵy tapsyrmalardy oryndaý bolyp tabylady. Tek osyndaı tekseris sharalarynyń negizinde jaýyngerlik daıarlyqtyń deńgeıin, jaýyngerlik ázirliktiń joǵary deńgeıine keltirýdegi jáne belgilengen aýmaqqa shoǵyrlanýdaǵy komandırler is áreketiniń tıimdiligin aıqyndaýǵa bolady.
