Eki apta buryn Bek Air kompanıasyna tıesili taǵy bir ushaqtyń shasıinde aqaý bolǵany anyqtalyp otyr, - dep habarlaıdy «Qamshy» portaly kaz.tengrinews.kz -ke silteme jasap.

27 naýryzda Bek Air kompanıasynyń Qyzylordadan ushqan ushaǵy Astana áýejaıyna aldyńǵy shasısiz apatty jaǵdaıda qonǵannan keıin áleýmettik jeli qoldanýshylary osyǵan uqsas oqıǵanyń budan buryn da bolǵanyn aıtýda.

Mysaly, áleýmettik jeli qoldanýshylary eki apta buryn Aqtóbe-Astana baǵytyndaǵy ushaqtyń shasıinde de aqaýdyń bolǵanyn aıtty. Bul aqparatty Bek Air kompanıasynyń basshysy Nurlan Jumasultanov rastaǵan. Onyń aıtýynsha, sol kezde shası shyqqanymen, kabınadaǵy sham janbaı qalǵan.

"Biz bul máseleni sheshtik. 27 naýryzda Astana áýejaıyna apatty jaǵdaıda qonǵan ushaq basqa bolatyn. Aqtóbe áýejaıynyń ushý jolaǵynda qar men sý aralasqan shalshyq jatqan. Ushaq jolaqpen júrgen kezde shalshyq shasıge de, kabınadaǵy shamdy jaǵýǵa arnalǵan tetikke de tıedi. Ushaq áýege kóterilgen kezde onda muz qatyp qalǵan eken. Shası tústi, degenmen sıgnal berý júıesi iske qosylmady. Ushaq jerge sátti qondy. Muz erigennen keıin sham jandy", - dedi ol. Kompanıa basshysynyń aıtýynsha, ushaq qonar aldynda 30 mınýt boıy aınalym jasaǵan.

Buǵan deıin Azamattyq avıasıa komıteti "Fokker-100" áýe kemelerin tehnıkalyq aktsyz paıdalanýǵa tyıym salǵan bolatyn. Degenmen Jumasultanovtyń aıtýynsha, Fokker-100 tıpti ushaqtar ázir ushyp júr. "Azamattyq avıasıa komıteti shasıdi jyıý jáne shyǵarý júıesin bir jolǵy tehnıkalyq tekseristen ótkizý jóninde nusqaý joldady. Biz bul jumysty oryndadyq, qazir eshqandaı másele joq. Ushaqtar tehnıkalyq tekseristen ótkizildi, kesheden beri ushaqtar qaıtadan áýege kóterile bastady. Ushýǵa eshkim tyıym salmaıdy. Azamattyq avıasıanyń osyndaı shara qoldanýy oryndy", - dedi ol.