Asa iri kólemde qarjy jymqyrǵan Aqparattandyrý jáne baılanys komıteti, «Qazaqtelekom», «QazTAG» JSHS-nyń laýazymdy tulǵalaryna qatysty qylmystyq isterdi tergeý jalǵasýda, - dep habarlaıdy «Qamshy» portaly 24kz-ke silteme jasap.

2010-2015 jj. Aqparattandyrý jáne baılanys komıtetiniń basshylary Qalánbekov, Qazanǵap pen Bersibaev «QazTAG» agenttiginiń basshysy Mataev Ásetpen 5 shart jasasqan.

Bul tulǵalar memlekettik satyp alý týraly zańdy óreskel buzyp, tek «QazTAG» agenttigimen shartqa otyrý jaǵdaıyn qasaqana týdyryp, ózge básekelesterdi shettetken.

Sotqa deıingi tergeý barysynda «QazTAG» agenttiginiń Bas dırektory Áset Mataev búdjet qarjysyn jymqyrýǵa tikeleı qatysqandyǵy anyqtaldy.

Áset Mataev jalǵan aktilerge ózi qol qoıyp, aqshany «Ulttyq baspasóz klýby» bólimshesiniń esep-shotyna aýdaryp otyrǵan.

Qazir sot Bersibaev, Arpabaev pen Áset Mataevqa qatysty «úı qamaqta ustaý» týraly bultartpaý sharasyn qoldandy.

Al Komıtettiń qazirgi tóraǵasy Qazanǵap pen eks-tóraǵa Qalánbekov «eshqaıda ketpeý týraly» tilhat jazyp berdi, dep habarlaıdy Jemqorlyqqa qarsy kúres jóninen ulttyq búro.