Búgin Elbasy Nursultan Nazarbaev Ulttyq bank basshysy Danıar Aqyshevti qabyldady, - dep habarlaıdy «Qamshy» portaly Aqorda saıtyna silteme jasap.
Kezdesý barysynda D.Aqyshev Memleket basshysyna Ulttyq banktiń qazirgi qyzmeti, sondaı-aq eldiń qarjy naryǵyndaǵy ahýal týraly baıandady.
Qazaqstan Prezıdenti qarajatty qazirgi ýaqytta ulttyq valútamen saqtaý halyq úshin tıimdi ekenin aıtty.
– Teńge boıynsha paıyzdyq mólsherleme joǵary, al shetel valútasyndaǵy salymdarda ol áldeqaıda tómen. Elimizdegi barlyq satyp alý, satý operasıalary jáne eńbekaqy tólemderi ulttyq valútamen júzege asyrylady. Negizgi taýarlardyń baǵasy turaqty. Sondyqtan qarajatty teńgemen saqtaý barlyq jaǵynan tıimdi. Halyqtyń ulttyq valútaǵa kóbirek den qoıǵany mańyzdy, – dedi Nursultan Nazarbaev.
D.Aqyshev naýryz aıynda valúta naryǵyndaǵy ahýal turaqtalǵanyn atap ótti.
– Munaı baǵasy, saýda seriktesterimiz bolyp sanalatyn elderdegi valúta baǵamy sıaqty pármendi syrtqy yqpaldar turaqtaldy. Osyndaı jaǵdaıda bıylǵy aqpan aıynan beri teńge nyǵaıa bastady, bul úderis osy aıda jalǵasty. Biz ulttyq valúta baǵamyndaǵy aýytqý aıtarlyqtaı tómendegenin jáne onyń 1,6%-ǵa nyǵaıǵanyn baıqap otyrmyz, – deıdi Ulttyq bank tóraǵasy.
Sonymen qatar D.Aqyshev salymdardy dollarsyzdandyrý úrdisi bastalǵanyn aıtty.
– El turǵyndary men kásiporyndar ulttyq valútadaǵy salymdaryn birtindep kóbeıte bastady. Osy aıda bul úrdis kúrt jedeldedi, – dedi Ulttyq bank tóraǵasy.
Memleket basshysy kezdesý qorytyndysy boıynsha birqatar naqty tapsyrma berdi.
Munaı baǵasynyń azdap bolsa da ósýine baılanysty elimizdiń qarjy naryǵynda ulttyq valúta baǵamynyń nyǵaıýy baıqalady. 25 naýryz kúni ótken aptanyń sońǵy qarjy saýdasynda dollar baǵamy 343,9 teńgeni quraǵan edi. Al, Qazaqstan qor bırjasyndaǵy búgingi saýda nátıjesinde AQSH dollarynyń ortasha baǵamy 340,15 teńgeni qurady.
Buǵan deıin «Asyl-Invest» kompanıasynyń taldaý departamenti basshysy Aıvar Baıkenov teńge baǵamy budan da nyǵaıý múmkindikterine ıe, tek Ulttyq banktiń valúta naryǵyna aralasýy teńge baǵamynyń ósýine kedergi keltirip otyr degen málimdeme jasaǵan bolatyn.
«Ulttyq bank áreketteri túsiniksiz bolyp otyr. Bylaı qarasaq, byltyr Qazaqstan erkin valúta naryǵyna kóshti. Al, is júzinde erki aınalym tek teńgeniń quldyraý baǵytynda ǵana júrip otyr. Al, teńge nyǵaıa bastasa Ulttyq bank aralasyp, ony tejeıdi. Bul menińshe, Úkimet tarapynan jasalǵan qysym saldarynan bolyp otyrǵan sıaqty. Óıtkeni, 2016 jylǵa arnalǵan búdjette dollar baǵamy 300 emes, 360 teńge bolady dep josparlanǵan. Makroekonomıkalyq kórsetkishterdiń ońalýyna baılanysty Úkimet búdjetti qaıta qaraýǵa qulyqsyz. Teńgeniń nyǵaıýy kerisinshe, jaǵymsyz senarı retinde qarastyrylýda», - degen pikirde A. Baıkenov.
Byltyrǵy jyly bekitilgen respýblıkalyq búdjette dollar baǵamy 300 teńge kóleminde bolady dep josparlanyp, jańa jyldan soń Úkimet bul jospardy qaıta qaraǵan edi. Nátıjesinde aqpan aıynda respýblıkalyq búdjetke ózgerister men tolyqtyrýlar engizilip, onda dollardyń ortasha baǵamy 360 teńge, munaı barreliniń ortasha jyldyq baǵasy 30 dollar kóleminde belgilengen bolatyn.
Jomart Abdollauly
