«Astana EKSPO-2017» ulttyq kompanıasynyń eks-basshysy Talǵat Ermegıaevtiń júrgizýshisi bolǵan Saıat Nádirbaev tutqyndaldy, - dep habarlaıdy «Qamshy» portaly.

S. Nádirbevtiń tutqyndalany týraly onyń qorǵaýshysy Aıman Omarova habarlady. Advokattyń aıtýynsha, jemqorlyqqa qarsy qyzmet ókilderi S. Nádirbaevtiń ustalǵany týraly onyń kámlettik jasqa tolmaǵan qyzyna telefon arqyly habarlaǵan.

«Biz keshe Saıat Nádirbaevtiń ustalǵany týraly bildik. Ol keshki altylar shamasynda ustalǵan, biraq onyń ustalǵany týraly saǵat toǵyzdar shamasynda habarlaǵan. Men baryp, qorǵaýymdaǵy azamatty kórmek bolǵan edim. Meni oǵan jibermedi. Bul jemqorlyqqa qarsy qyzmet tarapynan zańsyzdyq bolyp tabylady», - deıdi A. Omarova. Sondaı-aq, advokat S. Nádirbaevti tutqyndaý týraly hattamanyń kóshirmesin de ala almaı otyrǵanyn aıtqan.

Buǵan deıin, «Astana EKSPO-2017» kompanıasynyń burynǵy basshysy T. Ermegıaevtiń júrgizýshisi Saıat Nádirbaevqa Jemqorlyqqa qarsy qyzmet ókilderi búdjet qarjysyn jymqyrýǵa jáne sýbmerdiger kompanıalardyń birinen bir mıllıard teńge kólemindegi syıaqyny Ermegıaevtiń ózine berýge járdemdesti degen aıyp taǵylǵan bolatyn.

Aıman Omarova Feısbýk jelisinde S. Nádirbaevtiń áıeli Aıdanyń sózi jazylǵan vıdeo jarıalady.

Esterińizge salsaq, «Astana EKSPO-2017» kompanıasynyń burynǵy basshysy T. Ermegıaev byltyrǵy jyly maýsym aıynda úı qamaqqa alynyp, asa iri kólemde qarjy jymqyrdy degen aıyp taǵylǵan bolatyn. Qazir atalǵan is boıynsha tergeý aıaqtalyp, sot prosesi júrýde.