Belgili telejýrnalıst Dana Nurjigit halyq arasynda kóp synalyp kele jatqan "91" tobyna qatysty pikirin bildirip, top jetekshisi Erbolat Bedelhannyń eńbegin baǵalaıtynyn aıtqan, - dep habarlaıdy «Qamshy» portaly Baistars.kz – ke silteme jasap.

«Erbolat Bedelxanǵa aıtarym: On jyldan astam tańdaǵan jolynan jańylady, tabandy eńbek etip, bir kún-kól, bir kún-shól bolatyn násibin búkil tobyna jumsap júrgen Erbolatqa ornymnan turyp qol soǵam. Oǵan da kezinde qansha adam lap berip, «myna istep júrgeniń qate» degen edi, ol óziniń maqsatynan bas tartqan joq. Birjaqty qyńyrlyq, stereotıptik sana-damýdyń joly emes. Ásirese ónerde!» - dep jazdy Dana Nurjigit Instagramdaǵy jeke paraqshasynda.

Telejúrgizýshi osyǵan deıin qarsha boraǵan synǵa erekshe sabyrlyq tanytqan Erbolatty qoldaıtynyn jetkizdi. 

«Zaıytovtyń «91» tobynyń syrt kelbetin synap, til tıgizip, «jıirkenemin» degen aýyr sózin sabyrlyqpen tyńdap, judyryq ala júgirmeı (ony istese de túsiner edim) mıyǵynan ǵana kúlip qoıyp emosıaǵa, ashýǵa jol bermeı jaýap berip otyrǵan Erbolat men úshin oponentinen áldeqaıda joǵary, mádenıetti" - deı kele, osy syn arqyly prodúser tobyn shyńdap aldy degendi aıtady. "Ol qol astyndaǵy topty osylaısha sparıngke shyǵaryp aldy. Muzdaı dýshtyń astyna turǵyzdy. Synady. «...Shydaısyń ba menimen dostasýǵa, Jalań aıaq sý keship, tas tasýǵa», - dep Muqaǵalı aqynsha seriktesterine suraqty tótesinen qoıdy. Shash óser, boıaýy jýylar, trıko shalbar bop ózgerer. Biraq, araq iship, esirtki tartyp esirmegen, ónerde óz jolyn izdep, ósip kele jatqan jastardy osynshama talap, músirketip «Men sıaqty kostúm shalbar kımeısiń be, shashty durystap qysqartpaısyń ba?» - dep jer shuqytyp qoıý, qaz-qaz turyp kele jatqan balaǵa, «Nege júgirip ketpeısiń?» degenmen teń» - deıdi telejúrgizýshi.

Sondaı-aq Dana Nurjigit «91» toby sıaqty kórermen bir kezderi «A-stýdıony» da túsinbegenin aıtty. «Konformıster qashan da bolǵan, bola da beredi. Olardy tyńdasaq, elden erek, alystan asaý minezin bildiretin uzyn shash qoıǵan ánshi, aqyndarymyz - Batyrxan, Jarasqandar, Qadirlar qaıda bizge? Konformısterdi tyńdasaq, syǵan qyzy Karmendi operanyń bas keıipkeri etip, kórermenniń yzasyn týdyrǵan Bıze týmas edi. «Jalań aıaq syǵannyń saıqalyn operaǵa arqaý etken darynsyz» degen jaman atqa qalǵan Bıze búgin el aýyzyndaǵy klasık. «Araıdan» ketip, "Alma-Ata stýdıo" bolǵan Serkebaev Baıǵalıdiń ózi mundaıdy bastan ótkergen. AHBK saraıynyń konsert zalyndaǵy alǵashqy premerasynan xalyq turyp-turyp ketip qalǵan. Túsinbegen. Shashy jalbyraǵan jigitter, maıkisheń turyp án salǵan Batyrxandy bireý eske alsa, sol bizder. Bizdiń urpaq. Aıta berse kóp qoı».

Bedelhannyń bedelin qorǵaǵan Nurjigit jurtshylyqty synasa namysqa tıip emes, mádenıetti synaýǵa shaqyrdy.

«Ónerde uqsastyqtan jamany joq! Synasaq "jıirkenemin" degen adamı namysqa tıetin, kóshedegi betjyrtystyń leksıkonyna súıenip emes, konstrýktıvti, mádenıettaný degen ǵylymǵa júginip otyryp dáıekti dálel keltirip otyryp synaıyq!» - deıdi D. Nurjigit.

Buǵan deıin aıtysker aqyn Rınat Zaıytov bastaǵan birqatar azamattar «91» tobyn synǵa alyp, olardyń kıgen kıiminen, júris-turysyna deıin ultty masqaralaıtyn qylyq dep málimdegen bolatyn.