Jambyl oblystyq «Aqyl-esi kem balalarǵa arnalǵan ınternat úıinde»  Taraz memlekettik pedagogıkalyq ınstıtýtynyń uıymdastyrýymen «Balalarǵa qýanysh syılaıyq!» atty qaıyrymdylyq aksıasy ótti, - dep habarlaıdy «Qamshy» portaly oqý ornynyń baspasóz qyzmetine silteme jasap.

"İs-sharanyń maqsaty – jas urpaqtyń sanasyna meıirimdilik, súıispenshilik, qaıyrymdylyq uǵymdaryn qalyptastyrý. Sondaı-aq áleýmettik jaǵdaıy tómen balalarǵa kómek kórsetý, jasóspirimderdi kishipeıildilikke, baýyrmaldyqqa baýlý, balalarǵa az da bolsa qýanysh syılaý" delingen baspasóz qyzmeti taratqan habarlamada.

Ulystyń uly kúni – áz-Naýryz merekesi qarsańynda ótken aksıa barysynda ınstıtýt qyzmetkerleri «Ulyq mereke» atty teatrlandyrylǵan qoıylym kórsetip, oqýshylardyń oılaý qabiletin arttyrýǵa septesetin túrli oıyndar ótkizdi. Sonymen qatar jarymjan jetkinshektermen jumysta jańa ádis tabýǵa sheshim qabyldap, mektep ınternatta emdelip jatqan balalardyń saýyǵý prosesinde ónerdi keńinen qoldanatyn zamanaýı ádisti paıdalandy.

«Balalarǵa qýanysh syılaıyq!» qaıyrymdylyq aksıasy qoǵamdaǵy qaıyrymdylyq ıdeıalaryna qoldaý kórsetýge baǵyttalǵan.

– Áleýmettik ádildik, teńdik, ózara syılastyq pen qamqorlyq týraly nıetti tek qana memleket emes, azamattyq ortanyń óziniń kóterýi – qoǵamymyzdyń kemeldengenin kórsetedi. Qaıyrymdylyq – qazaq halqynyń eń izgi de asyl qasıetteriniń biri. Kemtar, jetim, qamqorlyqqa alynǵan balalarǵa aıaly alaqanyn tosyp, júrek jylýyn usyný, saýaby mol iske atsalysý árbir adamnyń azamattyq paryzy, – deıdi aksıany uıymdastyrýshylar.

Pedagogıkalyq ınstıtýttyń profesor-oqytýshylary men stýdentteri aldaǵy ýaqytta osy taqilettes sharalardy turaqty túrde ótkizýdi josparlap otyr.