QR Prezıdenti Ákimshiligi jetekshisiniń orynbasary Marat Beketaev Ortalyq komýnıkasıalar qyzmetinde ótip jatqan Jańǵyrtý jónindegi ulttyq komısıa músheleriniń baspasóz máslıhatynda jýrnalıserdiń suraǵyna jaýap bere kele, memlekettik qyzmetkerler arasynan jergilikti polısıa qyzmetkerlerine smartfon ustaýǵa ruqsat etiletinin aıtty, - dep habarlaıdy «Qamshy» portaly QazAqparatqa silteme jasap.

Al, Memlekettik qyzmet isteri jónindegi mınıstr Talǵat Donaqovtyń aıtýynsha, jumys ornynda smartfon paıdalanǵan ózge memlekettik qyzmetkerler tıisti zańnama boıynsha tártiptik jazaǵa tartylady. M.Beketaev habarlaǵandaı, memlekettik qyzmetkerler arasynda jergilikti polısıa ǵana smartfon ustap, azamattardan «WhatsApp» arqyly shaǵym qabyldaıdy. 

«Jergilikti polısıa qyzmetine kelsek, olarǵa (jergilikti polısıaǵa) «WhatsApp» arqyly habarlamalar alýǵa múmkindik beriledi. Jalpy, smartfon ustaýǵa tyıym salý týraly erejeni durystap oqysaq, ereje boıynsha qupıa qujattar bar mekemelerdiń qyzmetkerleri týraly aıtylǵan. Al, ýchaskelik polısıanyń jumys orny aýdandardyń aýmaǵyn qamtyıdy, sondyqtan, baılanys úshin oǵan smartfon kerek»,-dedi M.Beketaev.