Búginde Vashıngtonǵa álemniń túrli elderiniń basshylary aǵylýda, - dep habarlaıdy «Qamshy» portaly.

31 naýryz ben 1 sáýir kúnderi onda álemdik ıadrolyq qaýipsizdik jónindegi samıt ótedi. 2010 jyldan beri tórtinshi ret ótkeli otyrǵan antıadrolyq bas qosýǵa 52 eldiń delegasıasy qatysady dep kútilýde. Samıt jumysynan bólek qatysýshylar joǵary deńgeıdegi eki jaqty kezdesýler ótkizedi.

Osy jerde myna bir jáıtke nazar aýdarǵan jón. Nursultan Nazarbaevtyń aldynda ǵana AQSH-qa jetken Túrkıa basshysy Erejep Erdoǵandy Aq úı tarapynan birde-bir resmı tulǵa kútip alýǵa barmady. Erdoǵannyń aldynan Túrkıanyń Syrtqy ister mınıstri Máýlit Shaýyshuly shyqty.

Memleket basshylarynyń protkoldaryna saı birinshi basshyny qarsy alýǵa negizinen kútip alýshy eldiń basshysy nemese odan keıingi ekinshi, úshinshi tulǵalar, memlekettik hatshy, ıakı syrtqy ister mınıstri, tym bolmaǵanda sheneýnikter ishinen taǵaıyndalǵan arnaıy ókil baratyny belgili. Osyny eskersek, Túrkıa basshysynyń Aq úı úshin «senimdi seriktes» retindegi baǵasy tómendegen be degen oıǵa qalasyz. Bul kúdigimizdi Erdoǵan toqtaǵan qonaq úı aldynda Ankara saıasatyna narazylyq bildirgen aksıa ótkizgeni týraly habarlar da qoıýlata tústi.

Buǵan deıin AQSH prezıdenti Barak Obama Erdoǵannyń Merılend shtatynda Túrkıa qarajatyna salynǵan meshittiń ashylý saltanatyna shaqyrýyn da jaýapsyz qaldyrǵan. Al, samıt aıasynda Erdoǵan AQSH tarapynan memlekettik hatshy Djon Kerrımen ǵana eki jaqty kezdesý ótkizetini habarlandy.

Al, Reseı Federasıasy bul jolǵy samıtke qatysýdan múldem bas tartyp otyr.

Jalpy jıynǵa joǵary baıytylǵan ýrandy qoldanýdy azaıtý, ıadrolyq materıaldardy lańkesterden qorǵaý máseleleri sóz bolady delingenmen, samıtke qatysýshylar, onyń ishinde, AQSH, Túrkıa, Ýkraına syndy elderdiń basshylary geosaıası máselelerdi de alǵa tartary anyq. Kremldiń de bir memleket ótkizetin jıyn ǵalamdyq problema ıadrolyq qaýipsizdik máselesi úshin aıtarlyqtaı alań emes dep, bul samıtten at-tonyn ala qashýy da sodan bolýy múmkin.