Kaspi bank-tiń Astana qalasyndaǵy bir bólimshesi bóten kisiniń qujatymen úshinshi tulǵaǵa nesıe rásimdegen, - dep habarlaıdy «Qamshy» portaly Informbúroǵa silteme jasap.

«2013 jyly 21 qyrkúıekte Sh. degen bank menedjerin sendirip, bóten kisiniń jeke bas kýáligimen 110 000 teńge kóleminde nesıe alǵan», - delingen Astana qalalyq soty taratqan habarlamada.

Tergeý kezinde nesıe rásimdegen kelinshek qurbysynyń qujatyn urlap alyp, sonymen nesıe rásimdegeni belgili boldy.

Alaıda, zań buzýshy qylmystyq jaýapkershilikten bosatylǵan.

«QR Qylmystyq kodeksi 71-baby 1-bólimi 2-tarmaǵyna sáıkes, tulǵa aýyr emes qylmys jasaǵannan soń eki jyl ýaqyt ótip ketken jaǵdaıda qylmystyq jaýapkershilikten bosatylady», - delingen sot sheshiminde.

Buǵan deıin Óskemen qalasynda da atalǵan bank fılıalynyń bóten kisiniń qujatymen nesıe alǵany belgili bolǵan edi.