Burynnan atyshýly Murat Telebekov taǵy da aqparat alańynyń juldyzy bolatyn sıaqty. Ol «Nur» ıslam ýnıversıtetiniń prorektory Shámshádın Kerim men jýrnalıs Shynar Saǵyndyqty jala japty dep sotqa berip otyr. Bul týraly «Qamshy» portaly 365ınfo-ǵa silteme jasap habarlaıdy.

Prorektor men jýrnalısiń ústinen Telıbekovtiń aryz berýine bes jyl buryn jarıalanǵan vıdeosújet sebep bolǵan. Sol kezde «Almaty» arnasynda kórsetilgen beınesújette eldegi teris ustanymdaǵy dinı aǵymdardyń qyzmeti sóz bolady.

Shámshádın Kerim

Telıbekov sol sújettegi jýrnalıs Shynar Saǵyndyqtyń (qazir "Habar" arnasynda qyzmet etedi - red.) ózine qatysty «Ahmadıa sektasynyń ókili» degen pikiri men Shámshádın Kerimniń «Telıbekov «Nur» ýnıversıtetiniń stýdentterin týra joldan taıdyrýǵa árekettendi» degen sózderin ózine jabylǵan jala dep sanaıdy.

Bes jyl buryn telearnadan kórsetilgen sújet týraly Telıbekov jaqynda ǵana bilgenin aıtyp otyr.

«Bul sújet týraly eshteńe bilmegem. Birneshe aı buryn ol áleýmettik jelilerde belsendi túrde tarala bastady», - deıdi M. Telıbekov.

Sondaı-aq, M. Telıbekov Sh. Kerim men Sh. Saǵyndyqtyń túrli sebeptermen osymen úshinshi ret sot otyrystaryna kelmeı júrgenin aıtady. Ol sondaı-aq, sýdıa Sh. Kerimge qamaýǵa alý týraly bultartpaý sharasyn qoldanýy múmkindigin eskertedi.

Esterińizge salsaq, buǵan deıin Murat Telıbekov «Ultaralyq arazdyq týdyrdy» dep aıyptalǵan qoǵamdyq belsendiler S. Mámbetálın men E. Narymbaev isinde kýáger bolǵan edi.