Búgin «Nur.kz» ınternet portaly» JSHS Bas dırektory Qýat Bahrıdınov aqparat quralyna taǵylǵan aıyptarmen kelispeıtindikterin málimdedi, - dep habarlaıdy «Qamshy» portaly Nur.kz-ke silteme jasap.

Saıtqa taǵylǵan aıyptarǵa qatysty Q. Bahrıdınov sot prosesiniń bastalýyn kútý kerektigin aıtqan. «Shaǵymda kórsetilgendeı zań buzýshylyqtar oryn aldy ma?» degen suraqqa Q. Bahrıdınov:

«Biz taǵylǵan aıyptarmen kelissek mundaı maqala bolmas edi. Barlyǵy ózara sheshiler edi (...) Biz qazir sot otyrysyn kútip otyrmyz, onda barlyq taraptardyń dáıekteri aıtylady. Sosyn biz de osy farsqa tapsyrys berýshilerge qarsy talaptar qoıa bastaımyz», - degen.

Sondaı-aq, ol defacto.kz saıtyn tikeleı ózi shaǵym túsirmeı, ortaǵa shaǵymdanýshy retinde Avtorlyq quqyqty qorǵaý jónindegi Soltústik Qazaqstan qoǵamyn qosý arqyly mıllıondaǵan memlekettik baj tóleýden jaltarmaq dep aıyptady.

Qýat Bahrıdınov búgin «Nur.kz» ınternet portaly» JSHS Bas dırektory bolyp taǵaıyndaldy. Ol sonymen qatar, «7-arnany» basqarýshy «ERA» telekompanıasy» JSHS-nyń da Bas dırektory qyzmetin atqarady. «Nur.kz» ınternet portaly» JSHS-nyń 80 paıyz úlesi de osy Q. Bahrıdınovqa tıesili ekendigi aıtylady. Ashyq derekkózderinde saıttyń qalǵan 20 paıyz úlesi Calidus Investment Limited degen kompanıaǵa tıesili ekendigi habarlanǵan. Buǵan deıin de atalǵan ınternet-resýrstyń menshik ıeleri týraly aqparat quraldarynda shýly maqalalar jaryq kórgen bolatyn.