Olımpıada chempıony Ilá Ilın Talǵat Ermegıaevti qoldaý úshin sot otyrysyna qatysty, - dep habarlaıdy «Qamshy» portaly kaz.tengrinews.kz – ke silteme jasap. Qylmystyq ister jónindegi aýdanaralyq mamandandyrylǵan sotynda "Astana EKSPO-2017" ulttyq kompanıasynan qarajat jymqyrý isi boıynsha basty sot otyrysy ótip jatyr.
"Shynymdy aıtsam, bul jaıly birinshi ret estigende, kóńilim túsip ketti. Talǵat Ermegıaevti jaqsy basshy retinde bilemin. 2012 jyly biz birge jaqsy jumys istegen edik, elimizge olımpıadanyń eki dúrkin chempıonyn ákelgen edik. İs boıynsha eshteńe aıta almaımyn. Biraq ony jaqsy adam dep bilemin, habarlastyq, dos boldyq deýge de bolady. Mundaı basshylar az", - dedi Ilın otyrystyń úzilisinde.
"(...) Sondyqtan kóńilim túsip júr. Onyń tek jaqsylyǵyn bilemin. Oǵan Londonda tapsyrylǵan is keremet oryndaldy. Muny barlyǵymyz bilemiz. Qazaqstan quramasy 15 medal aldy. Mine, osyny aıta alamyn", - dedi Ilın.
Ol osy is boıynsha kúdikti bolyp otyrǵan Sergeı Ilın degen azamattyń týysy emes ekenin de aıtty.
"Men Talǵat Ermegıaev jaıly aıtýǵa keldim. Jaqsy adamdy qoldaýǵa keldim. Janym qalap keldim. Endi ne bolaryn bilmeımin. Muny sot sheshedi", - dedi ol.
18 naýryzda Astanada "Astana EKSPO-2017" ulttyq kompanıasynan qarajat jymqyrý isi boıynsha basty sot otyrysy bastalǵan edi. Bul iste 23 adam kúdikke ilinip otyr. Olar istiń 500 tomymen tanysyp shyǵýy kerek.
Eske sala keteıik, 11 maýsymda Ermegıaev "Astana EKSPO-2017" UK" AQ basqarma tóraǵasy qyzmetinen bosatylǵan bolatyn. Sonymen qatar, sot buǵan deıin "Astana EKSPO-2017" UK AQ qurylys departamentiniń burynǵy basshysy Úsenovti qamaýǵa alý túrindegi bultartpaý sharasyn sanksıalady. "Astananyń №2 Almaty aýdandyq soty "Astana EKSPO-2017" UK AQ qurylys departamentiniń burynǵy basshysy Úsenovke qatysty Astana prokýratýrasymen kelisilgen jáne sotqa deıingi tergeý organynyń tańdaǵan qamaýǵa alý túrindegi bultartpaý sharasyn qabyldaǵan bolatyn. Qazirgi ýaqytta Úsenov "EKSPO-2017" keńesshisi qyzmetinde. Úsenovke búdjetten 214 000 000 teńgeni jymqyrdy jáne asa iri kólemde ysyrap etti degen kúdik keldi", - delingen Joǵarǵy sot baspasóz qyzmetiniń habarlamasynda.
