Pavlodar turǵyny, qoǵam belsendisi Rýza Beısenbaıtegi bıliktiń joǵary minberlerinen aıtyla bastaǵan orta mektepterde úsh tilde oqytý júıesine kóshý týraly bastamaǵa alańdaýshylyq bildirip, el azamattaryn atalǵan bastamaǵa qarsylyq tanytýǵa shaqyrdy, - dep habarlaıdy «Qamshy» portaly.

Rýza Beısenbaıteginiń aıtýynsha, bul bastama qazaq tiliniń taǵdyryna úlken qaýip tóndirip, ana tilimizdiń bilim, ǵylym, joǵary tehnologıa tiline aınalýyna kedergi jasaıdy. Qazaq tilin meńgergen azamattardyń qatarynyń sıreýine alyp keledi.

Belsendi joǵary deńgeıde kóterilip jatqan osy bastamaǵa qatysty Ashyq hat uıymdastyryp, ony Elbasyǵa, Bilim jáne ǵylym mınıstri men Parlament depýtattaryna joldamaq.

Tómende Rýza Beısenbaıtegi uıymdastyryp jatqan Ashyq hat mátinin jarıalap otyrmyz.

QR Prezıdenti N. Nazarbaevqa

QR Bilim jáne ǵylym mınıstri E. Saǵadıevke

Senat jáne májilis depýtattaryna

BAQ ókilderine

Ashyq hat

Bilim júıesi, Qazaq eliniń mektep jasyndaǵy urpaǵyna kezekti eksperıment júrgizbekshi. Soraqysy osy jolǵysy -  tilimizdiń múlde óshýine (bul ult óshýiniń alǵysharty ekeni sózsiz) qoıylǵan tóte jol. 

Sebebi, mektepterde endi 2 pán ǵana qazaqsha – Qazaqstan tarıhy jáne qazaq tili, qalǵan barsha jaratylystaný pánderi aǵylshyn tilinde ótpek, orys tili jáne dúnıe júzi tarıhy oryssha ótpek. Bul - ultqa degen qarýsyz, ashtyqsyz, t.b. fızıkalyq túrmen emes, biraq naqtyly rýhanı genosıd dep baǵalaýǵa ábden bolatyn jahandyq shara. Óıtkeni barsha mamandar, óte jýyq bolashaqta (qazaq tili men Qazaqstan tarıhy mamandarynan basqalary) aǵylshyn tildi bolmaq. Barlyq ǵylymnyń alǵysharty jaratylystaný pánderi ekeni belgili. Bul qazaq tili ǵylymnan yǵysady, alǵashqyda qoldaný aıasy múlde tarylyp, sońynan tarıh qoınaýyna ketedi degen sóz. Óıtkeni qoǵamdaǵy qatynas - sol qoǵamdy qurap otyrǵan mamandardyń tilinde ótetini anyq.
Osy oraıda, bunyń QR konstıtýsıasyna múldem qaıshy ekenin jáne Elbasymyzdyń 2 joldaýyn:

- 2012-jylǵy: «Qazaq tili 2025 jylǵa qaraı ómirdiń barlyq salasynda ústemdik etip, kez kelgen ortada kúndelikti qatynas tiline aınalady. Osylaısha, táýelsizdigimiz búkil ultty uıystyratyn eń basty qundylyǵymyz – týǵan tilimizdiń mereıin ústem ete túsedi. Tilge degen kózqaras shyndap kelgende elge degen kózqaras ekeni daýsyz. Sondyqtan oǵan beı-jaı qaraı almaımyz»;

- 2014-jylǵy: «Qazaq tili ǵylym men bilimniń, ınternettiń tiline aınaldy. Endi eshkim ózgerte almaıtyn bir aqıqat bar. Ana tilimiz Máńgilik elimizben birge máńgilik til bolady»), - eske sala otyryp, QR barlyq mektepterdegi bastaýysh synyptardyń memlekettik tilde oqytylýyn, orta mekteptiń 70 paıyzynan kem emes bóliginde oqý tili memlekettik, qalǵany suranys tilinde bolýyn talap etemiz!

Shetel tilderi: aǵylshyn, nemis, t.b. tilder pán retinde, qajettilik boıynsha, gýmanıtarlyq jáne jaratylystaný baǵyttary boıynsha oqytylsyn. 
Qazaq tilinen ádeıi úrkitý pıǵylmen jasalyp otyrǵan qastandyq - halyqaralyq termınderdi qazaq tiline aýdarý doǵarylsyn. Óıtkeni, ár damyǵan tolyqqandy ómir súre alatyn tilder – júmys tili, ıaǵnı zamanaýı tehnıka men tehnologıalar tili. 

Tek osy jolmen júrsek qana tarıhta óz ultyn tili arqyly joıǵan memleket retinde qalmaıtynymyzǵa, kerisinshe ultymyzdyń aldyndaǵy paryzymyzdy ár azamat sezinip, damyǵan memleketterdiń ortasynan ornymyzdy oıyp ornyǵatynymyzǵa senimdimiz!

Ashyq hatty uıymdastyrýshy – baıanaýyldyq qoǵam belsendisi Rýza Beısenbaıtegi.