Jańadan saılanatyn májilis depýtattary parlamentke tıesili «Nursaıa» turǵyn úı keshenindegi páterler daıyn bolǵansha Astanadaǵy «Pekın Palas» qonaq úıine ornalastyrylatyny týraly saılaýǵa deıin de jazǵan bolatynbyz. Saılaý ótip, parlament májilisi jumysyn bastaǵan soń jańa quramdaǵy birqatar depýtattardyń atalǵan qonaq úıge ornalasqany jarıa boldy.
Bul qoǵamda qyzý talqyǵa túsip, jurtshylyq táýligine 120 myń suraıtyn qonaq úıge ornalasqan «halyq qalaýlylarynyń» ysyrapshyldyǵyn synaýǵa kiristi.
Osy rette depýtattar da qarap qalmaı, qorǵanysqa kóshti. Komýnıs-depýtat A. Qońyrovtyń aıtýynsha, qonaq úıge májilismenderdiń barlyǵy emes, tek 31 depýtat qana ornalasqan kórinedi.
«Syrttan kelgen depýtattarǵa berilip otyr. Olar qysqa merzimge qonaq úıge ornalastyryldy. bizdiń fraksıadan depýtat Smırnova sonda», - deıdi depýtat.
Al, parlamenttiń sharýashylyq basqarmasyndaǵylar aqparat quraldarynda aıtylyp jatqandaı, qonaq úıde bir táýlikke turý quny 120 myń teńge emes, 29 myń teńge kórinedi. Qonaq úı ákimshiligi memlekettik satyp alýlar konkýrsyna qatysyp, osyndaı baǵa usynypty.
Osy rette áriptesteriniń abyroıyn qorǵaǵan Gúljan Qaraǵusovanyń sózine erekshe toqtalyp ótken jón.
Biraz jyl halyqty áleýmettik qorǵaý salasyn basqarǵan hanym qonaq úı taqyrybyn qozǵaǵan jýrnalıserge:
«Sizder tıisti deńgeıdegi, qupıalarǵa ıe, qol suǵylmaýshy tulǵa bolyp tabylatyn depýtattardyń saǵattap jalǵa beriletin páterlerde turǵanyn qalaısyzdar ma?», - dep dúrse qoıa beripti. Onyń aıtýynsha, buda turǵan eshteńe joq. Búdjette osy maqsatta qarjy qarastyrylǵan. Álemdik tájirıbede depýtattyq deńgeıdegi adamdar qandaı jaǵdaıda ómir súrý kerektigi áldeqashan basy ashylǵan másele eken.
Depýtat hanymnyń «Saǵattap jalǵa beriletin» páterler týraly qaıdan biletini óz aldyna bólek áńgime, al, «memlekettik qupıalardy biletin tulǵalar» kóringen jerde jatpaýy kerek degeni biraz oıǵa qaldyrady.
Olaı deıtinimiz, birqatar aqparat quraldary bul qonaq úıdiń qytaılyq «Hýa Ioý» kompanıasynyń menshiginde ekenin, ol kompanıanyń álemdik munaı óndirýshi 50 kompanıa ishinde 7-oryn ıelenetin Qytaı ulttyq munaı korporasıasyna (CNPC) qatysy baryn ashyq jazýda. Sonda, Gúljan Qaraǵusova aıtpaqshy, memlekettik qupıalarmen jumys isteıtin depýtattar sheteldik qonaq úıde ne istep júr?
Parlamenttiń sharýashylyq basqarmasyndaǵylar búginnen bastap aldyńǵy shaqyrylymdaǵy depýtattar turǵan páterlerdiń bosaǵanyn, jańa májilisshiler sol páterlerge ornalastynyn habarlady.
Jomart Abdollauly
