Premer-mınıstrdiń orynbasary Darıǵa Nazarbaeva Aqmola oblysynyń ortalyǵy kókshetaý qalasyna barǵan saparynda jergilikti sheneýnikterden ońbaı aldanǵan sıaqty, - dep habarlaıdy «Qamshy» portaly.
«Vıse-premerdi aldaý» operasıasynyń jaı-japsaryn «Feısbýk» áleýmettik jelisinde jergilikti Málik Ǵabdýllın mýzeıiniń ǵylymı qyzmetkeri Oıýly Qýanysh Erǵalıuly jaıyp salǵan.
«...Qosh, sonymen Darıǵa Nazarbaeva Kókshetaýǵa keledi degen habar taraǵan soń bizdiń Aqmola oblysynda ala shapqyn bastaldy deısiń bir. Eldiń bári anaý úsh tilge qatysty reforma qabyldanbasa eken dep ýaıymdap júrse, bizdiń basshylar soǵan atsalyspaq nıette eken. Tipti qatty tyrysqany sonshalyq Darıǵa hanymnyń ózin aldap jibergen ǵoı. Darıǵa nómiri №2 mektepke barmaq bolǵan eken, bizdiń suńǵyla basshylar ekinshi mekteptiń oqýshylarynyń ornyna №3 mekteptiń oqýshylaryn otyrǵyzyp qoıypty. Otyrǵyzyp qoıyp «bıologıa» pánin aǵylshyn tilinde ótkizipti.
Áı, sabazdarym-aı! Ne degen aqyl, ne degen mı?! Osy jaǵdaıǵa baılanysty ata-analar men ustazdardyń, oqýshylardyń arasynda renish bar. Kim ózin, bolmasa óziniń balasyn bireýden kem kóredi? Árıne, renishteri oryndy», - dep jazady ǵylymı qyzmetker.
Kókshetaýlyq bilim berý salasy sheneýnikteriniń bylyǵyn ashqan Qýanysh Erǵalıuly mundaı áreketterdiń eń aldymen urpaq tárbıesine keri áser etetinin aıtyp otyr.
«Al, endi basty másele – biz kimdi aldap júrmiz?! Jas urpaqty ótirikpen aýyzdandyryp júrip, qalaı betimiz búlk etpeı tárbıe týraly sóz aıtamyz?! Sonda Darıǵa Nazarbaevany qarsy alýǵa oblystyń yǵaı-syǵaılary barǵan, kim ekenin attaryn atap, túrlerin tústemeı-aq qoıaıyn, solardyń bireýi osy másele týraly jaq ashpaǵanyna nalımyn. El bolamyz deımiz, qaıdan el bolamyz myna túrimizben jas balanyń kózin baqyraıtyp qoıyp kózinshe "oınas jasap" jatsaq. Uıat emes pe?! Kúlemiz be, jylaımyz ba?!
Osy jazbam úshin jergilikti bılik meniń de mańdaıymnan sıpamasyn bilem! Biraq úndemeı qalýǵa azamattyq ar-ujdanym jibermedi. Ún qosyńyzdar aǵaıyn! Ana tili olarǵa kerek bolmasa bizge kerek! Men balamnyń máńgúrt bolǵanyn qalamaımyn!», - dep qorytady oıyn Qýanysh Erǵalıuly.
