Almaty qalasy ákimdigine qalalyq 9 mamyr - Jeńis kúni merekesin Astana alańynda ótkizýdi usynamyn. Nege jyl saıyn Jeńis kúni meıramynda Keńes Odaǵynyń batyrlary Álıa Moldaǵulova men Mánshúk Mámetovanyń eskertkishteri jetim qyzdyń kúıin keshý kerek? Nege Batyrlarǵa laıyqty qurmet kórsetilmeıdi? Bul - bir.

Ekinshiden, 28 panfılovshy atyndaǵy saıabaq qalanyń ortasynda jáne aýmaǵy úlken emes. Jylda meıramǵa jınalǵan adamdar syǵylysyp zorǵa júredi, kólikpen ótý tipti múmkin emes. Byltyrlary halyqtyń kóptiginen adamdar birin-biri taptaı jazdady, nátıjesinde birneshe ardager súrinip qulap, densaýlyqtaryna zıan keltirip jatty. Bıyl da sondaı keptelisterdiń bolmaýyna kim kepil? Qala basshylyǵynyń eń aldymen turǵyndardyń qaýipsizdigin oılaýy mańyzdy emes pe?

Astana alańyn kólikten jaýyp tastasaq, halyqtyń emin-erkin jınalýyna, úlken sahna quryp, konsert berýge jáne Álıa men Mánshúk eskertkishine gúl shoqtaryn qoıýǵa tolyq múmkindik bolady. Halyq syımaı, birin-biri tappaýǵa jol berilmeıdi.

Noıabr Kenjeǵaraev