Depýtattardyń qonaq úıine qazynadan ketken shyǵyn 8 mıllıon emes, 51 mıllıon teńge. Birqatar Buqaralyq aqparat quraldary búgin konkýrstyń hattamasyn jarıalap, jańa sandardy aıtty. Alaıda Parlamenttiń sharýashylyq basqarmasy birer kún buryn shyǵyndy 8 mıllıonnan aspady dep sendirgen. Basqarma sandardan taǵy shatasty ma? Depýtattardyń kúnkórisine memleket qansha jumsady? Bul suraqtardyń jaýabyn 31-arna izdep kóripti.
Ózin "táı-táı basqan depýtatpyn" deıdi Marat Bopazov. Taldyqorǵannan kelgenine eki aıdan aspaǵan halyqtyń nemese "Nur Otannyń" qalaýlysy elordaǵa endi úırenip jatyr eken. Jetisý sıaqty jylýlyǵy joq jelordada júrgenimen, bir apta buryn jaıǵasyp alǵan "Nursaıany" nurly da, saıaly da deıdi. Al "Pekın palasta" turǵan on bes kúni úshin memlekettiń qansha tólegeninen beıhabar. Tek jurttyń daýryǵyp depýtattardyń ishken-jegeni men turmysyn talqylap jatqanyna renjýli.
MARAT BOPAZOV, QR Parlamenti májilisiniń depýtaty:
- Eshqandaı alyp ketip bara jatqan artyqshylyǵymyz joq. Komısıa sheshimi tústi, burynnan turǵan mebelmen berdi. Aktimen qabyldap ótkizdi, men qabyldap aldym. Qasqyrdyń aýzy jese de qan, jemese de qan deıdi ǵoı.
Al Astana ǵalymdary depýttarǵa renjip júr eken. Depýtattardyń qonaq úıi úshin qazynadan ketken 50 mıllıon degen somany estigende "tóbe shashym tik turdy" deıdi ǵalym Baqyt Altynbasov. 10 jyl sabaq berip, Astanada páter jaldap kúneltken oqytýshy "ǵalymdar jataqhanasyna" áreń qoly jetipti. "Nursaıa" ispetti elıt klass bolmasa da, jaraıdy. Tek, jalaqymdy túgel páter jaldaýǵa jumsamasam boldy deıdi.
BAQYT ALTYNBASOV, Ǵalym:
- Depýtattar jaǵdaıy nashar halyq emes. Olardyń barlyǵynyń jaǵdaıy óte jaqsy. Ózderiniń úıleri de bar alyp qoıǵan. Sondyqtan olardyń jylaǵandyǵy bolmas. Ǵalymdar kúnin áreń kórip júr. Qaı jaqtan 129 myńǵa nómir. Áreń júr ǵoı.
Jurttyń bári osylaı narazylyq bildirgen soń, "Pekın palastaǵy" 31 depýtattyń 15 kúnine nebári 8 mıllıon ketti dep Parlamenttiń sharýashylyq basqarmasy aıtqan. Biraq búgin BAQ ókilderi somanyń shyn máninde 51 mıllıon teńge ekenin taǵy jazdy. Biz osy suraqty basqarmanyń ózine qoıdyq.
Maman:
- 51 mln-ǵa dogovor jasasqan. 8 mln-ǵa po faktý oplatasy júrgizilgen. Qalǵan aqsha úkimetke qaıtarylady.
Basqarma, bul somanyń bir jyl úshin eseptelgenin aıtty. Sebebi satyp alý, 12 aıǵa júrgiziledi eken. Biraq depýtattar bar bolǵany jarty aı turyp, 40 mıllıonnan artyǵyn "únemdep" aldyq degen sharýashylyq, qalǵan qarjy mindetti túrde qazynaǵa qaıtarylady dep sendirdi.
