M.Áýezov atyndaǵy Qazaq memlekettik akademıalyq drama teatry Táýelsizdigimizdiń 25 jyldyǵy men qarashańyraq teatrdyń 90 jyldyǵyna oraı Taldyqorǵan men Tekeli qalalaryna 21-22 sáýir kúnderi gastróldik saparmen baryp, I.Saparbaıdyń «Syǵan serenadasy» spektaklin qoıyp qaıtty,-dep habarlaıdy Qamshy.kz.
«Táýelsizdigimizdiń 25 jyldyǵy men teatrymyzdyń 90 jyldyǵy tuspa-tus kelip, mereıli merekeler bir-birimen ushtasyp jatqan sátte Respýblıka kóleminde spektáklder qoıýdaǵy maqsatymyz - qalyń jurtshylyqty Táýelsizdigimizdiń 25 jyldyǵymen quttyqtaý jáne teatrymyzdyń búgingi tynys-tirshiligimen tanystyrý. Jeri shuraıly, shóbi shúıgin Jetisý jerinen bastalǵan gastrolimiz elimizdiń ózge de aımaqtarynda jalǵasyn tabatyn bolady», - deıdi teatr dırektory, QR eńbek sińirgen qaıratkeri Erlan Bilál.
Almaty oblystyq Bıken Rımova atyndaǵy drama teatrynyń ujymy oblys óńirine gastróldik saparmen barǵan M.Áýezov teatryn qazaqı dástúrmen aldynan aq alyp shyǵyp, dámnen aýyz tıgizip, aq batasyn berip, qushaq jaıa qarsy aldy. Jaqsy nıet, jyly qabaq, aq peıilderimen kútip alǵan Taldyqorǵandyqtardyń yqylasy qoıylym tobyn bir marqaıtyp tastady. Al B.Rımova teatryna bet túzegen ujymymyzdy Almaty oblysy ákiminiń orynbasary Baqtıar Ónerbaev qarsy aldy. Ol: «Qurmetti Jetisýlyqtar, búgin qazaq óneriniń bıik shyńynan oryn alǵan M.Áýezov teatrynyń KSRO halyq artısi Asanáli Áshimov pen teatr dırektory, QR eńbek sińirgen qaıratkeri Erlan Bilál bastaǵan ujym Almaty oblysynyń ákimi A.Batalovtyń uıymdastyrýymen gastróldik saparmen kelip otyr. Bıyl Elbasy N.Nazarbaevtyń ruqsatymen A.Batalovtyń bastaýymen Taldyqorǵan qalasynda teatr salynbaqshy. Sonda A.Áshimov bastaǵan óner maıtalmandary kelip tusaýyn kesedi. Sol sebepti, B.Rımova atyndaǵy teatr men Ákemteatr qoıan-qoltyq jumys istep, shyǵarmashylyq baılanysta bolady dep oılaımyn», - dep sózin qortyndylady.
Eı, tákappar dúnıe!
Maǵan da bir qarashy.
Tanısyń ba, sen meni
Men - Qazaqtyń balasy! - dep Qasym Amanjolovtyń óleńimen sózin bastap, Jetisý jurtymen amandasqan Asanáli Áshimov: «Qurmetti kórermen qaýym, baýyrlar, óner - halyqtiki! Bıyl bizge 90 jyl. 1926 jyly 13 qańtarda óner maıtalmandary, qarapaıym halyqtyń arasynan jınalǵan top teatr qurdy. Solardyń ishinde Q.Qýanyshbaev, S.Qojamqulov, E.Ómirzaqov, Á.Qashaýbaev, I.Baızaqov syndy teatr korıfeıleri boldy. M.Áýezovtiń ózi Ádebıet bólimin basqarǵan. Keıin qataryna K.Báıseıitova, Sh.Aımanovtar kelip qosyldy. Sol uly adamdardyń bastaýy juǵymdy bolyp, teatr aıaǵyna tik turyp, shańyraǵynan Opera teatryn, Fılarmonıany bólip shyǵardy. Búginde qarashańyraq, Ákemteatr bolyp otyrǵan óner ordasy Oblys basshylarynyń tapsyrmasymen Respýblıka aımaqtaryn aralap spektákl qoıýǵa Taldyqorǵan qalasyna kelip otyr. Sizderge uly Shámshi Qaldaıaqovtyń ómiri men shyǵarmashylyǵyna arnalǵan «Syǵan serenadasy» múzıklimen kelip otyrmyz», - dedi.
Spektáklde Shámshi rolin QR eńbek sińirgen qaıratkeri Bekjan Turys, Izolda rolin Shynar Janysbekova oınady. Aleko roline Qazaqstannyń «Serper» Jastar odaǵy syılyǵynyń laýreaty Almas Shaıahmetov vvod jasady. Sonymen qatar, Baronesa rolinde QR eńbek sińirgen artısi Ǵazıza Ábdinábıeva óner kórsetse, Shámshiniń anasynyń rolin Taldyqorǵan óńiriniń týmasy, QR eńbek sińirgen artısi Shámshágúl Meńdıarova oınady.
Spektáklden keıin túndeletip Tekeli qalasyna jol júrgen teatr ujymy 22 sáýir kúni Tekeli qalasynyń mádenıet úıinde óner kórsetti.
Qara sózdiń qadirin biletin, qazaq ónerin qasterleıtin Jetisý halqy Shámshiniń «qulaqtan kirip, boıdy alar» ánderin súısine tyńdap, kórgenderin kókirek-kóńilderine túıip, asqaq Alataýdyń baýraıyna erkeleı ornalasqan alyp shahar Almatydan kelgen ónerpaz qaýymǵa alǵystaryn jaýdyra shyǵaryp saldy. Al «jaqsy bastama - istiń jartysy» ekendigin sezingen artıserdi alda áli talaı Uly dalanyń ulaǵatty urpaqtary kútip tur edi.
Móldir BEKJAN
