Atyraý oblysynyń ákimi Nurlan Noǵaev Qurmanǵazy aýdanynyń eks-ákiminiń júrgizýshisin jalǵan memlekettik nómirmen ustady. Oblys ákiminiń bastamasymen júrgizýshige qatysty hattama toltyryldy, - dep habarlaıdy Qamshy portaly Aqjaıyq basylymyna silteme jasap.
29 sáýirde oblys ákimi jańa aýdan ákimi Bıboz Shaıahmetovti tanystyrý úshin Qurmanǵazy aýdanyna bardy. Noǵaev pen óz isin jalǵastyrýshy ákimdi sol kezdegi aýdan ákimi Amangeldi Baraqatov qyzmettik kóligimen qarsy almady. Biraq oblys ákimi basqa nársege tań qaldy. Kamrı 50 kóliginiń aldyńǵy bamperinde reseılik standartta tirkelgen nómirlik belgi, al artqy jaǵynda - qazaqstandyq nómir belgisi boldy. Keıinirek bul ahýal múldem kúlkili oqıǵaǵa ulasty. Reseıdiń tranzıttik memlekettik nómiriniń jelimi ajyrap, ar jaǵynan qazaqstandyq nómir kórinip qaldy. Zań buzýshylyqty baıqaǵan oblys basshysy Qurmanǵazy AİİB bastyǵy Júsip Tóreǵalıevti shaqyryp aldy:
"Nelikten zań buzýshylyqqa baqylaý jasamaısyzdar? Eger bul kólikke aýdan ákimi minetin bolsa, oǵan bári bolady dep, qol tıgizbeısińder me?!", - dedi Noǵaev.
Nurlan Noǵaev zań buzýshylyq týraly hattamany sol jerde toltyrýdy talap etti. 2013 jyldyń naýryzynda óz qalaýymen jumystan bosatylǵan aýdannyń burynǵy ákimi Baraqatov qyzmettik kóliginiń jóndeýde turǵanyn, bir aptadan beri kómekshisiniń jeke kóligimen júrgenin rastady.
"Kólik Astrahannan alynǵan. Kólik quralyn tirkegennen keıin tranzıttik nómirdi júrgizýshi AİİB-ge tapsyrýǵa tıis edi", - dedi Tóreǵalıev.
Zań buzýshyǵa ÁQtK-tiń 590-shy ("Kórineý jalǵan nemese qoldan jasalǵan memlekettik tirkeý nómiri belgileri bar kólik quralyn basqarý") baby boıynsha hattama toltyryldy. İs sotqa joldandy, júrgizýshige 20 AEK mólsherinde aıyppul jáne bir jylǵa júrgizýshi kýáliginen aıyrylý qaýpi tónip tur.
