AQSH-tyń Qazaqstandaǵy elshiligi elimizdiń batys óńirlerinde oryn alǵan mıtıńterdiń artynda amerıkalyqtar tur degen pikirlerge qatysty málimdeme jasady, - dep habarlaıdy Qamshy.kz sn.kz-ke silteme jasap.
Áleýmettik jeliler men BAQ-ta jarıalanyp jatqan osynaý materıaldar shyndyqqa janaspaıdy deıdi elshilik ókilderi.
«AQSH-tyń Qazaqstandaǵy elshiligi qyzmetkerleri kúndelikti jańalyqtardy jibermeı oqyp otyrady jáne atalǵan pikirlerden de qulaǵdar. Bul aqparat – jalǵan» delingen elshiliktiń birinshi hatshysy Devıd Gambldyń BAQ-tarǵa bergen jaýabynda.
Dıplomattar elshi Djordj Kroldyń osydan bir aıdaı ýaqyt buryn Qazaqstannyń batys óńirlerin ne úshin aralap kelgenin de aıtyp ótti.
«AQSH elshisiniń is-sapar baǵdarlamasy ashyq boldy, ol Atyraý men Aqtaý qalalarynyń ákimderimen jolyǵyp, eki el arasyndaǵy dostyq baılanystyń 25 jyldyǵy aıasynda pikir almasty, ınvestısıa kólemin arttyrý máselelerin talqylady Sonymen qatar, QR Prezıdenti Nursultan Nazarbaevtyń «100 naqty qadam - Ult josparyn» júzege asyrýda elshiliktiń josparlarymen bólisti" deıdi AQSH elshiliginiń bas hatshysy.
Atalǵan sapar barysynda Djordj Krol Aqtaý portynda bolyp, keıin Mańǵystaýdyń áýlıeli jerlerin aralaǵan. Sondaı-aq, ol Atyraý kitaphanasynda leksıa oqydy.
Aıta keteıik, 2016 jyldyń 1 shildesinde qoldanysqa enetin Jer kodeksine qarsy qazaqstandyqtar sońǵy eki aptada birneshe mıtıń ótkizip úlgerdi. Atyraýda bastalǵan sherý Aqtóbe men Semeı, Aqtaý men Jańaózen jáne Qyzylorda qalalarynda jalǵasyn tapty. Narazy toptyń talaby - jerdiń satylýy men sheteldikterge jalǵa berilýine tyıym salý.
Al, áleýmettik jelilerde osynaý mıtıńterdiń artynda AQSH pen Batys elderi tur degendi aıtýshylar az emes. Tipti, "Eýrazıa" birinshi arnasy áldebir syrtqy kúshterdiń mıtıń qatysýshylaryna 150 AQSH dollarynan taratyp jatqanyn senimmen málimdedi. Azattyq tilshisine jaýap bergen Májilis depýtaty Bekbolat Tileýhan da ol mıtıńterden syrtqy jáne ishki kúshterdiń aralasýyn kórip otyrǵanyn aıtqan bolatyn.
