Ál-Farabı atyndaǵy Qazaq Ulttyq ýnıversıtetinde jyl saıyn dástúrli túrde ótkiziletin «Miss KazNU – 2016» baıqaýy óz máresine jetti. Eki aıǵa sozylǵan baıqaý nátıjesi boıynsha 200 úmitkerdiń arasynan 16 arý iriktelip, aqtyq fınalda óz ónerlerin pash etti, - dep habarlaıdy Qamshy.kz.

Merekelik jıynnyń basyn QazUÝ rektory Ǵalymqaıyr Mutanuly ashty. Ol: «Bizdiń stýdentterimiz kóktem mezgilinde «Miss KazNU – 2016» baıqaýyn taǵatsyzdana kútedi. Búgingi merekemen barshańyzdy shyn júrekten quttyqtaǵym keledi. Ataýly mereke tek qana sulýlyq baıqaýy emes, bul synnyń qatysýshylarǵa berer tárbıelik máni de zor. «Sulýlyq álemdi qutqarady»,- deıdi emes pe, osy tusta sulýlyqty shyńyraý shyńǵa teńeýge bolady. Kez kelgen adam órkendegende eń úzdigine qarap boı túzeıdi, eń ozyǵyn úlgi etedi. Árıne, bul tusta tek qana syrtqy sulýlyq elenbeýi tıis, sol syrtqy pishin men ishki sulýlyq ta baılanysyp bir jaıly garmonıada bolýy tıis», - dep atap ótti.

Sulýlyq pen óner jarystyrǵan baıqaýda qatysýshylarymyz sálemdesý, defıle, ıntellektýaldy  jáne shyǵarmashylyq saıys syndy tórt bólim boıynsha baq synady. Aldymen qatysýshylar ózderin vıdeotúsirilim arqyly qazaq, orys, aǵylshyn tilderinde tanystyryp ótse, ekinshi týrda «Event dress» salony usynǵan ádemi kóılektermen defıle kórsetti. Sáni men symbaty kelisken arýlarymyz úshinshi bólim – ıntelektýaldy synda da des bermeı, qoıylǵan suraqtarǵa múdirmesten jaýap berdi. Al baıqaýdyń basty talaptarynyń biri sońǵy kezeń - óner saıysynda biri Gúlnaz ben Oraldyń mahabbatyn somdasa, endi biri aspanǵa kóterilip án shyrqady. Biri myń burala shyǵys bıin bılese, biri Maıkl Djeksonnyń stılinde óner kórsetti.  

Atalmysh synǵa qazaq estradasynyń ártisteri, kásibı fotograf-stılıster, ýnıversıtet jastar uıymynyń basshylyǵy qazylyq etti. Ádil-qazylar sheshimi boıynsha 16 úmitkerdiń arasynan sýyrylyp shyǵyp halyqaralyq qatynastar fakúltetiniń stýdenti Janerke Amirzadanova ekinshi vıse-mıss atansa, birinshi vıse-mıss tıtýlyn shyǵystaný fakúltetiniń stýdenti Aqdıdar Sultanova ıemdendi. Al baıqaýdyń shyn júırigi dep tanylyp, «Miss KazNU – 2016» ataǵyn hımıa jáne hımıalyq tehnologıalar fakúltetiniń stýdenti Shyryn Aqpar jeńip aldy. Ózge qatysýshylar da nazardan tys qalmady. Barlyq qatysýshylarǵa ár túrli nomınasıalar taǵaıyndalyp, qundy syılyqtar tartý etildi.