Búgin Astana qalasyndaǵy «Nur Orda» mektep-lıseıinde «KATEV» Halyqaralyq qoǵamdyq qorynyń uıymdastyrýymen qazaq-túrik lıseı oqýshylarynyń arasynda respýblıkalyq «Jas jasampazdar joba jarysy» jáne «Robototehnıka» saıysy bastaldy, - dep habarlaıdy Qamshy.kz.
Sharanyń saltanatty ashylýyna QR Bilim jáne ǵylym mınıstrligi mektepke deıingi jáne orta bilim departamentiniń dırektory Jontaeva Jańyl Alpamysqyzy, «KATEV» Halyqaralyq qoǵamdyq qorynyń vıse-prezıdenti Abdýrahman Sel, Astana qalasynyń maslıhat depýtaty Kasenov Gaıdar, Respýblıkalyq Daryn ǵylymı-praktıkalyq ortalyǵynyń dırektory Qırabaeva Sholpan Aqashqyzy, «NurOrda» mektep-lıseıiniń dırektory Orhan Oztomsýk jáne taǵy da basqa qonaqtar qatysty.
«Jas jasampazdar joba jarysy» bul - Qazaqstan Prezıdenti Nursultan Nazarbaevtyń «Qazaqstan joly – 2050: Bir maqsat, bir múdde, bir bolashaq» Joldaýy aıasynda osymen 3 ret uıymdastyrylyp jatyr. Sondaı-aq, «EXPO-2017» balamaly energıa kózderi, áleýmettik-qoǵamdyq máseleler, jaratylys taný jáne gýmanıtarlyq baǵyt boıynsha ótkiziledi.
Al, Robotıks saıysy bıyl alǵash ret oqýshylardyń ekologıalyq, shyǵarmashylyq, logıkalyq, qasıetterin nyǵaıtý, haı-tek jáne nanotehnologıalardy ıgerip, tehnıkaǵa degen qyzyǵýshylyǵyn damytý úshin uıymdastyrylyp otyr. Oǵan elimizdiń barlyq óńirindegi qazaq-túrik lıseılerinen 200-den asa oqýshy qatysýda. Shara barysynda oqýshylar robot jasaıtyn jańa úlgidegi «LEGO-ROBOT» sekildi baǵdarlamalardy paıdalanady.
Ádilqazylar quramyna robototehnıka salasynda qyzmet etetin Qazaqstan jáne shetel mamandary men ǵalymdary kiredi. Oqýshylar arasynan jaqsy nátıje kórsetken jobalar «Startap» retinde qarastyrylyp, kásipkerlikte qoldanylatyn bolady. Mundaı júldelendirý úrdisi balalardyń kúrdeli ǵylymı suraqtardyń jaýabyn izdeýge, aýtentıkalyq zertteý jumystaryn qoldanýǵa, erteńgi kúnniń ózekti máselelerine sheshim tabýǵa ıtermeleıdi.
Sondaı-aq, saıys nátıjesinde joǵary oryn ıelengen balalar Koreıada jáne Brazılıada ótetin jarysqa joldama alady.
Nýrıla Asanbaı jáne Altynaı Mombekova, Shymkent qalasyndaǵy qyz balalarǵa arnalǵan qazaq-túrik lıseı oqýshylary:
Bizdiń búgin alyp kelgen jobamyz «SMART DOOR» ıaǵnı, «Aqyldy esik» dep atalady. Jalpy jumys isteý joly bylaı: Biz esikke arnaıy dybystardy este saqtaıtyn jáne magnıtpen jumys jasaıtyn eki qurylǵy ornattyq. Birinshisi – siz nemese otbasyńyzdaǵy belgili bir adamar ǵana biletin esik qaǵý dybysy. Máselen, siz bastapqyda esikti saýsaqtarmen nemese qolmen 4-5 ret qaǵý nemese taǵy da basqa joldar arqly ornatyp alasyz. Sodan keıin osy dybysty este saqtap alǵan esik tek siz esik qaqqanda ǵana ashylady.
Al, ekinshisi – qazir kópqabatty úılerde qoldanylyp kele jatqan magnıttik qurylǵy (domofon). Munda esiktiń arnaı jerine ornatylǵan qurylǵy bolady. Siz sonda tek ózińizde bolatyn kartochkany sol jerge tıgizseńiz esik ashyla qoıady.
Sharanyń saltanatty jabylý rásimi erteń 10:00-de Nurorda mektep-lıseıinde ótedi.
Saparǵalı Qanat
