AQSH prezıdenti Barak Obama osy aıda Japonıanyń Hırosıma qalasyna barady, - dep habarlaıdy Qamshy.kz Azattyqqa silteme jasap.
Obama - tarıhta birinshi atom bombasy tastalǵan Hırosımaǵa baratyn AQSH-tyń is basyndaǵy alǵashqy prezıdent bolmaq. Aq úı AQSH basshysy Hırosımaǵa 27 mamyrda Azıa elderine jasaıtyn sapary aıasynda baratynyn málimdedi. Obama Japonıada "Úlken jetilik" elderiniń samıtine qatysady. Ol sapar aıasynda Vetnamǵa da barmaq.
Prezıdent ákimshiliginiń habarlaýynsha, bul sapary Obamanyń "beıbitshilik pen ıadrolyq qarýsyz qaýipsizdikti qamtamasyz etý" prınsıpine adal ekendigin dáleldeıdi. Biraq AQSH bıligi Obama Hırosımada resmı túrde keshirim suraýy múmkindigin joqqa shyǵardy.
Budan jetpis jyldan astam ýaqyt buryn Hırosıma jáne Nagasakı qalalaryna AQSH qoldanǵan joıqyn qarý 150 myńǵa jýyq adamnyń ómirin qıǵan. Sodan keıin bes jyldyń ishinde túrli aýrýlardan kóz jumǵan taǵy 156 myń adamnyń ajalyn dárigerler atom bombasy jarylysy saldarymen baılanystyrady.
