Qajettilik týyndasa Úkimet Dúnıejúzilik bankten 2 mlrd. dollarǵa deıin qaryz ala alady. Búgin Májilistiń jalpy otyrysynda QR Qarjy mınıstri Baqyt Sultanov osylaı málimdedi, - dep habarlaıdy Qamshy.kz QazAqparatqa silteme jasap.

Eske salsaq, jalpy otyrysta «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy Qaryz týraly kelisimdi ratıfıkasıalaý týraly» zań jobasy talqylanǵan bolatyn. Ol boıynsha Dúnıejúzilik bank Qazaqstanǵa makroekonomıkalyq basqarý jáne ekonomıkanyń básekege qabilettilin arttyrý saıasatyn qarjylandyrý úshin 1 mıllıard dollar mólsherinde qaryz beredi.

«Bul Dúnıejúzilik bankten alynyp otyrǵan birinshi kredıt. Biz atalmysh bankpen qaryz aıasyndaǵy kelissózderdi 2013 jyly bastaǵan bolatynbyz. 2014 jyly búdjettiń atqarylýy boıynsha problemalar oryn alyp, búdjetti eki márte naqtylaǵan edik. Byltyr da búdjetti eki márte túzettik. Sondyqtan da, álemdik naryqta munaı baǵasynyń tómendeýine baılanysty týyndaǵan problemalar ornyqtylyqqa, búdjettiń kiris bóligine áser etti», dedi mınıstr.

Onyń aıtýynsha, osyndaı túsimderdiń tómendeýine baılanysty búdjet tapshylyǵy byltyr úsh paıyzǵa deıin arttyryldy. Bıyl da tapshylyq shamamen úsh paıyzǵa boljanǵan bolatyn.

«Ázirshe búdjet tapshylyǵy bir paıyz shamasynda turaqtap otyr. Negizinen biz Dúnıejúzilik bankpen kelissózderdi eki mıllıard dollar kóleminde júrgizgen bolatynbyz. Sondyqtan da birinshi kredıt boıynsha bir mıllıard dollarmen shektelip otyrmyz. Degenmen, aldaǵy ýaqytta elimiz úshin taǵy bir mıllıard dollar alýǵa qajettilik týyndasa, onda biz ony tarta alamyz. Qazirshe bundaı qajettilik týyp otyrǵan joq, sondyqtan bir mıllıard dollarmen shektelemiz», - dedi B. Sultanov.