Qytaıdan kelgen qazaqtar qaǵazbastylyqtyń qurbany bolýda, - dep habarlaıdy Qamshy.kz 31-arnaǵa silteme jasap.
Almatyda Qytaıdan kelgen bir top etnıkalyq qazaq qujat rásimdeýdiń qıyndyǵyn aıtyp, azamattyq alýdyń azaby qajytqanyna narazy. Qytaı tarapynan múlde berilmeıtin anyqtamany talap etetin resmı oryndar kóship keletin qandastardyń jolyn bógep tur deıdi. Tipti, qujat máselesi rettelmeı Qazaqstanǵa kelgenderdiń birazy Qytaıǵa qaıta kóship ketipti. Al el Úkimeti azamattyq alý jaıyn áli de birjaqty retteýge asyǵar emes.
Jıylǵandardyń qıyndyǵy ortaq, janaıqaıy bir - qujat rásimdeý áýrelegen. Tipti, Qazaqstanǵa kelgenine birneshe jyl bolsa da azamattyq ala almaı sendelgen jurt resmı oryndardyń joq qujattardy talap etetinin túsinbeı dal. Aıtýlarynsha, oralman kýáligin alýdyń ózi qıyndaǵan. Al azamattyq alý úshin qajetti sottalmaǵanyn rastaıtyn anyqtama Qytaıda berilmeıdi eken.
SAIRANGÚL EREJEPBAIQYZY, Oralman:
- Bir jyldyq vızamen kelip, júrdim osy jaqta. Tórt jyl júrip qoıdym osylaı. Endi yhtıar hat tapsyraıyn desem, sottalmaǵan qaǵaz alyp kel deıdi. Sottalǵan adam Qazaqstanǵa kelmeıdi ǵoı. Onyń ústine ony bermeıdi Qytaıda.
Amalyn taýyp alyp kelgen anyqtamany jaramsyz dep keri qaıtarady deıdi jınalǵandar. Qytaı astanasynan basylatyn mórdi talap etedi eken. Al kóp shyǵynmen, biraz ter tógip aldyrǵan "sottalmady" degen anyqtamany merzimi ótip ketti dep taǵy qabyldamaıdy. Atajurtqa oralǵysy keletin qandastardyń jolyn bógep turǵan anyqtamany qaıta qaraý týraly úkimetke usynys aıtylǵan. Alaıda ózgeris bolmady. Kedergilerdi joıyp, qandastardyń kóshi-qon jaıyn retteýge at salysyp júrgen belsendi Aýyt Muqıbek másele sheshilmese úkimetti sotqa beremin deıdi.
AÝYT MUQIBEK, Aqyn:
- Bul máseleni sheshýdiń bir-aq joly bar. Ol - úkimetti sotqa berip, sot arqyly ǵana dáleldep sheshý. Oǵan meniń qolymda qujattar jetedi. Qytaı halyq respýblıkasynyń bergen jaýaptary bar, Syrtqy ister mınıstrligi arqyly jáne basqa da dáleldi qujattar kóp.
Qytaıdan kelip, atajurtqa taban tiregisi kelgen qalyń jurttyń muńyna aınalǵan qujat áýresi kóshtiń basyn Qazaqstanǵa burýǵa úlken tosqaýyl eken. Atajurtqa kettim degen bir adam keri qaıtsa, bir aýylǵa keri áseri tıedi deıdi qandastar.
