Halyq arasynda qatty narazylyqqa ushyraǵan jer reformasy men bilim berý salasyndaǵy bastamalarǵa qatysty túsindirý jumystary áskerıler arasynda da júrýde, - dep habarlaıdy Qamshy.kz QR Ulttyq ulany «Ońtústik» óńirlik qolbasshylyǵynyń baspasóz qyzmetine silteme jasap.
Búgin Ulttyq ulannyń Almaty qalasynda ornalasqan «Ońtústik» óńirlik qolbasshylyǵynda óńirlik qolbasshylyq qolbasshysy general-maıor Álibek Serálıevtiń basshylyǵymen óńirlik qolbasshylyq áskerı bólimderiniń áskerı qyzmetshilerine elimizde biraz daý týdyrǵan Jer Kodeksine jáne bilim berý men densaýlyq saqtaý salasyna ózgerister engizý týraly bastamalardy túsindirýge arnalǵan kezdesý ótti.
Memleket basshysy, Qazaqstan Qarýly Kúshteriniń Joǵarǵy Bas qolbasshysy Nursultan Nazarbaevtyń bul jumystar aıasynda qabyldanýy tıis jańa normalardyń, bilim berý men densaýlyq saqtaý salasyndaǵy ózgeristerdiń halyqqa durys jetkizilmegendigin, durys talqylanbaǵandyǵyn eskergen Álibek Bolatuly jeke quramǵa jańa normalardy keńinen tanystyryp, talqyǵa saldy. Ol óz sózinde:
«Qazirgi naryqtyq qoǵamda arandatýshylyqqa jol berilmeýi kerek, Elbasymyzdyń júrgizip otyrǵan saraly saıasaty memleketimizdiń bolashaǵy úshin mańyzdy ekenin umytpaıyq. Prezıdentimiz usynǵan bes ınstıtýsıonaldy reformalardyń júzege asýy, bul – turaqtylyq pen jasampazdyqtyń kepili», - deı kele, áskerı qyzmetshilerge, osy máselelerdi otbasy múshelerine durys túsindirýdi tapsyrdy. Bunymen qosa qolbasshy aǵymdaǵy jyldyń 26 sáýirinde ótken Qazaqstan Halyqtary Assambleıasynyń «Táýelsizdik. Kelisim. Bolashaǵy birtutas ult» atty 24 sesıasynda qabyldanǵan «Máńgilik El» atty patrıottyq aktisin áskerı qyzmetshilerge baıandap, elimizdiń «Máńgilik El» dárejesine jetý jolyndaǵy Elbasy usynǵan aýqymdy 7 baǵyttyń árqaısysyna jeke-jeke toqtalyp ótti.
Qolbasshynyń túsindirme jumystarynan keıin qyzmetine jaqynda ǵana taǵaıyndalǵan Almaty garnızonynyń áskerı prokýrory, ádilet polkovnıgi Sátken Tilekjan óńirlik qolbasshylyqqa arnaıy kelip, joǵaryda atalǵan máselelerge baılanysty óziniń pikirin bildirdi. Sátken Baýyrjanuly aǵymdaǵy jyly qabyldanǵan «2016-2018 jyldarǵa arnalǵan Qazaqstan Qarýly Kúshteri, basqa da áskerleri men áskerı quralymdaryndaǵy quqyq buzýshylyqtyń aldyn alý» týraly jańa baǵdarlamany júzege asyrý boıynsha jumystar qolǵa alynǵanyn atap ótip, nashaqorlyq, korrýpsıa, sýısıd jáne basqa da qylmystar týraly sóz qozǵady, sondaı-aq onyń aldyn alý týraly paıymdy mysaldar keltirdi.
Qolbasshy men áskerı prokýrorǵa áskerı qyzmetshiler de ózeginde júrgen baspana alý, túrli járdemaqylar men jeńildikter týraly kókeılerinde júrgen máselelerdi qozǵap, qoıǵan suraqtaryna tıisti jaýaptar aldy.
