El Prezıdentiniń tapsyrmasymen elimizde Jer reformasy jónindegi komısıa quryldy. Onyń quramyna 75 adam kirip otyr,  - dep habarlaıdy Qamshy.kz BNews.kz-ke silteme jasap.

QR Premer-mınıstriniń birinshi orynbasary Baqytjan Saǵyntaev tóraǵalyq etetin komısıanyń alǵashqy otyrysy 14 mamyrǵa josparlanǵan.

«Elbasynyń tapsyrmasyna sáıkes, Jer reformasy jónindegi komısıa quryldy. Komısıa quramyna 75 adam kiredi, olardyń ishinde Senat jáne Májilis depýtattary, Úkimet músheleri, memlekettik organdardyń, saıası partıalardyń, agrobıznes ókilderi, ǵalymdar, qoǵam belsendileri bar. Komısıada barlyq óńirlerdiń ókilderi qamtylǵan. Biz elimizdi, onyń beıbit bolashaǵy úshin alańdaıtyn azamattardy yntymaqtasýǵa shaqyrdyq», - deıdi komısıa tóraǵasy B.Saǵyntaev.

Onyń aıtýynsha, halyqty barynsha qamtý úshin oblystyq ákimdiktiń janynan qurylǵan qoǵamdyq keńester de osy jumysqa jumyldyrylmaqshy.

«Komısıa bizdiń azamattarymyzdyń pikirtalastarynyń barysy týraly barynsha shynaıy aqparatty buqaralyq aqparat quraldary arqyly ashyq túrde alýy úshin jumys isteıdi», - deıdi B.Saǵyntaev.

Budan bólek, arnaıy «Jerturaly.kz» portaly iske qosylyp otyr. Portalda komısıanyń jumysy týraly barlyq aqparat jarıalanady.

«Bul saıtta adamdar kókeıtesti suraqtaryn qoıyp, óz usynystaryn qaldyra alady. Qosymsha arnaıy Call-center jumys isteıdi», - deıdi komısıa tóraǵasy.