Reseılik telearnalardyń Qazaqstanda kórsetilýi shynymen shekteletin sıaqty, - dep habarlaıdy Qamshy.kz.
Esterińizge salsaq, byltyr jarnama tártibin retteıtin zańnamalarǵa ózgerister enip, onda sheteldik telearnalardaǵy jarnamalardy Qazaqstan aýmaǵynda habar taratý kezinde shekteý talaby engizilgen bolatyn. Buǵan a degende eldegi kabeldik habar taratýshy kompanıalar narazylyq tanytyp, dabyl qaqty. Osyǵan baılanysty byltyr jeltosaq aıynda sol kezdegi ınvestısıa jáne damý mınıstrligine qarasty aqparat, aqparattandyrý jáne muraǵat komıteti atalǵan talaptyń oryndalýyn 2016 jyldyń 1 shildesine deıin shegere turý kerek degen sheshim shyǵarǵan. Oǵan deıin kabeldik operatorlar men memlekettik mekemeler bir mámilege kelýi tıis bolatyn.
Jarty jyldan astam ýaqyt ótse de taraptar bir toqtamǵa kele almaǵan syńaıly. Munyń basty sebebi sheteldik arnalardaǵy jarnamany ekranǵa shyǵarmaı qıyp alatyn birińǵaı qondyrǵy qoldanýdyń múmkin emestiginde kórinedi. Al, ondaı quralsyz, sheteldik arna basshylary bizge taratatyn habarlaryndaǵy jarnamalardy qıyp alýdan bas tartyp otyrsa kerek.
Muny Almatyda ótken «Asian Cable TV Conference-2016» konferensıasyna qatysýshylar da rastady.
«Qazteleradıo» AQ komersıalyq dırektory Baqtıar Oshýrbaev mundaı másele úkimetaralyq deńgeıde sheshilýi kerek dese, «Qazaqtelekom» AQ menedjeri Olga Drelına «Reseılik arnalardyń bulaı shirenýi negizsiz emes, óıtkeni, bizde olardyń ornyn basatyn basqa kontent joq» degendi aıtady.
Osylaısha, taraptardyń bul máselede bir sheshimge kele almaýyna baılanysty, shildeden bastap telearnalarymyz reseılik kontentten birshama tazaryp qalatyn sıaqty. Qalaı bolǵanda da, byltyr qabyldanǵan zań bıyl oryndalýy tıis. Onyń ústine, zańnamadaǵy bul ózgeristerdi otandyq telearna basshylary biraýyzdan qoldap shyqqan bolatyn. Tek bir qyzyq jeri aldaǵy Olımpıada men fýtboldan Eýropa chempıonatyn túnimen tamashalaıtyn jankúıerler qaýymyna qıyn bolǵaly tur.
Darhan Muqantegi
