Ánshi Qaırat Nurtas 2013 jyly usynǵan «Ókinish» atty ómirbaıandyq týyndysynyń jalǵasyn kókrermenge usynbaq. Senarıi jazylyp jatqan kınonyń túsirilim jumystary shilde aıyna josparlanǵan.

Fıl týraly aıtýǵa ánshiniń ázirge qoly bos emes. Jańa beınebaıan túsirip júrgen Qaırat Nurtas bul týraly habar jetkizýdi ádettegideı anasy ári prodússseri Gúlzıra Aıdarbekovaǵa qaldyrdy.

“Kınoǵa kirisýdemiz. Qazir senarıi jazylyp jatyr. Ony eki aı boıy jazamyz dep josparlaǵan bolatynbyz. Kózdi ashyp-jumǵansha bir aıy ótip ketti. Shilde aıynda túsirsek, qarasha-jeltoqsan aılarynda kórermen nazaryna usynamyz. Bul týyndyda Qaırat Nurtas basqa qyrynan tanylady. Al basqa qupıalardy ázirge aıtpaı qoıa turaıyn”, – deıdi Gúlzıra Aıdarbekova. Prodúser jasyrǵanymen, bul qupıany óner juldyzdary jaqsy biletin bolyp shyqty.

Qaırat Nurtastyń otbasymen etene jaqyn aralasatyn Sıvı Mahmudı ánshiniń kezekti týyndysynyń qupıalarymen bólisti. Ol fılmde Qaırat Nurtastyń áıeli men tórt balasynyń oınaıtynyn aıtty.

“Kóp jyldan beri jasyryp kelgen soń ózgeshe etip ashqysy keledi. Gúlzıra apamyz halyqpen tanyssyn degen oımen kıno túsirip jatyr. Munymen qatar, aqsha jınasaq degen de oılary bar. Sonsha jasyrǵan soń eńbekteri esh ketpeýi kerek qoı. Qudaı qalasa, kınoda jubaıy men tórt balasy oınaıdy. Basty róldi Qaırattyń áıeli men tórt bala-shaǵasy somdaıdy”, – deıdi Sıvı Mahmudı.

Sonymen, biraz jyl jeke ómiri qupıa bolyp kelgen Qaırat Nurtastyń kórermenge daıyndaǵan tosyn syıy aldaǵy kúz aılarynyń birinde kórsetiletin bolady.