Ústine dáretin shashqan júrgizýshini tárbıelemek bolǵany úshin 5 jylǵa sottalǵan polıseıdi İshki ister mınıstriniń ózi qoldap otyr. Azamattyq ar-namysyn qorǵamaq bolǵan tártip saqshysyna kesilgen jazamen kelispeımin degen general Qalmuhambet Qasymov tipti Joǵarǵy sotqa ótinish jazypty, - dep habarlaıdy Qamshy.kz . 31 arnaǵa silteme jasap.
Degenmen, búgin májiliste jańadan qurylǵan jergilikti polısıanyń jumysy jaıly baıandama jasaǵan mınıstr qazaq tilinde suraq qoıǵan depýtatqa orys tilinde jaýap berip qyzyq jaǵdaı jasady.
Jańa saılanǵan májilis aldynda birinshi ret baıandama jasaǵan Qasymov myrza, depýtattardy mandattarymen quttyqtap sóz bastady. Ótken jyly atqarylǵan jumystaryn qorytyndylap, polıseılerdiń júktemesine de toqtaldy. Ásirese, jergilikti polıseıdiń ókiletine qaraıtyn kólik júrgizýshileri máselesin basa aıtty.
QALMUHANBET QASYMOV, QR İshki ister mınıstri:
- Jol apattarynyń 70 paıyzdan astamy júrgizýshilerdiń kinásinen bolyp jatady. Atap aıtqanda, joǵary jyldamdyqpen júrý, jaıaý júrginshiler ótkelin elemeý syndy zań buzýshylyqtar. Byltyr sot sheshimimen 39 myń azamat kólik júrgizý quqyǵynan aıryldy. Onyń 29 myńdaıy mas kúıinde ustalyp, 4 myńy ákimshilik qamaqqa alyndy.
Al, ishimdik iship, temir tulparymen júrgenderdi tártipke salmaq bolǵany úshin basy báleli bolǵan polıseıler máselesi she? Mınıstrdi tyńdap bolǵan depýtattar osyndaı suraq qoıdy. Májilismender ústine dáretin shashyp jibergen mas júrgizýshini shapalaqpen urǵany úshin 5 jylǵa sottalǵan jezqazǵandyq tártip saqshysyn eske saldy. Bul jaǵdaı qoǵamda qyzý talqyǵa túsip, kópshilik serjant Tólegen Igibekovtyń jazasy qısynsyz degen bolatyn. Depýtattar da ereje buzǵan azamattyń áreketin, memleketke qarsy zańsyzdyq dep baǵalady.
ARMAN QOJAHMETOV, QR Parlamenti Májilisiniń depýtaty:
- Sottalǵan polıseıdi jáne onyń otbasyn qorǵaý úshin qandaı sharalar qolǵa alyndy? Serjant Igibekovtiń qatysýymen ustalǵan azamat qandaı jazaǵa tartyldy?
Qalmuhanbet Qasymov polıseıdiń ar-namysyn qorlaǵany úshin júrgizýshini esh jaza tartpady dedi. Onyń ústine saraptama nátıjesinde soqqynyń izi baıqalmaǵanyn eskerip, jazamen kelispeıtindigin ashyq aıtty.
QALMUHANBET QASYMOV, QR İshki ister mınıstri:
- Men óz basym joǵarǵy sot alqasyna isti qaıta qaraý týraly ótinish jazdym. Bul talabymyz qabyldanyp, nátıjesin jýyq arada biletin bolamyz.
Sodan soń ózge depýtattar da ózin tolǵandyrǵan máselelerdi kóterdi. "Tek qazaq tilinde suraq qoıamyn" degen eń jas májilismen Gennadıı Shıpovskıh óz ýádesinde turdy. Al mınıstr áli kúnge ana tilin úırene almaǵan syńaıly.
GENNADII SHIPOVSKIH, QR Parlamenti Májilisiniń depýtaty:
- Sońǵy 8 jyldyń kóleminde respýblıka boıynsha ýaqytsha oqshaýlaý ortalyǵy, beıimdelý, quqyǵyn qalpyna keltirý ortalyqtaryna 70 myńnan astam kámeletke tolmaǵan jasóspirimder jetkizildi. Onyń ishinde 10 796-sy balalar úıi jáne mektep ınternattaryna ornalastyrylǵany belgili. Sizge suraǵym, osy kórsetkishterdi azaıtý úshin qazirgi kezde naqty qandaı is-sharalar qoldanyp jatsyzdar? Rahmet!
- Suraqqa rahmet! Ruqsat bolsa oryssha jaýap bereıin. Ia ýje v svoem doklade govorıl chto eto problema nomer odın seıchas...
Serjantyna arasha túsken general, jalpy tártip saqshysynyń jumysy aýyr ekenin alǵa tartty. Aıtýynsha, jylyna 6 jarym myńdaı polıseı jumystan shyǵady eken. Onyń jartysynan kóbi óz erkimen ketedi. Óıtkeni, júktemeleri kóp, al jalaqysy az. Onyń ústine, Jezqazǵandaǵy sıaqty tártip saqshysynyń mártebesin túsiretin jaıttardy qosyńyz.
