OQO-da polıseıler ákesinen aqsha alý úshin ózin urlaǵany týraly oqıǵa qurastyrǵan jas jigitti ustady, dep habarlaıdy Qamshy.kz OQO İİD baspasóz qyzmetine silteme jasap.
2016 jylǵy 10 mamyrda OQO İİD Uıymdasqan qylmyspen kúres basqarmasyna «Vatsap» arqyly onyń 1988 jyly týylǵan ulyn belgisiz bireýler zańsyz ustap otyrǵany, jábirlenýshiden 20 myń AQSH dollaryn talap etkeni týraly habarlama alǵanyn aıtyp, Shymkenttiń 53 jastaǵy turǵyny júginedi.
Bul fakti Biryńǵaı sot aldy tergeý tizilimine tirkelip, QR QK 126-baby (zańsyz erkindiginen aıyrý) boıynsha qylmystyq is qozǵaldy.
Sol kúni keshki saǵat 21.00 shamasynda jedel izdestirý sharalary barysynda OQO İİD UQKB qyzmetkerleri 8 shaǵyn aýdandaǵy kóp qabatty úılerdiń aýlasynan 28 jastaǵy jas jigitti ustady.
Tergeý barysynda polıseıler zańsyz erkindiginen aıyrý faktisin rastaǵan joq. Jas jigit tanysyna iri somada qaryz bolǵandyqtan, ákesinen 20 myń AQSH dollaryn alý úshin ózin urlaǵany týraly oqıǵany oıdan qurastyrǵan bolyp shyqty.
Qazirgi sátte polıseıler istiń mán-jaıyn anyqtaýda. Sot aldy tergeý bastaldy.
