Búgin Elbasy Nursultan Nazarbaev ótken 4 aıdaǵy áleýmettik-ekonomıkalyq damý qorytyndylaryna arnalǵan keńes ótkizdi, - dep habarlaıdy Qamshy.kz.
Oǵan ortalyq memlekettik organ basshylary, oblys ákimderi, Astana jáne Almaty qalalarynyń ákimderi qatysty.
Jıynda memleket basshysy eldiń áleýmettik-ekonomıkalyq damý kórsetkishterine baǵa berdi.
«Biz jumyssyzdyqtyń ósýine jol bermedik. Onyń kórsetkishin burynǵy 5 paıyzdyq deńgeıde saqtap qaldyq. Búdjettik kiristerdiń kemýine qaramastan barlyq memlekettik áleýmettik mindettemelerdi saqtap qalý týraly tapsyrma bergen bolatynmyn. Halyqtyń ál-aýqatyn tómendetýge bolmaıdy. Bul – barlyq deńgeıdegi memlekettik organdardyń negizgi mindeti. Osy jyly biz bilim salasyndaǵy búdjettik qyzmetkerlerdiń eńbekaqysyn 29 paıyzǵa, densaýlyq saqtý salasyndaǵy jumysshylardyń jalaqysyn 28 paıyzǵa, basqa salalardaǵylardikin 40 paıyzǵa ósirdik. Shákirtaqy kólemi, múgedekter men asyraýshysynan aıyrylǵandarǵa tólenetin járdemaqylar da 25 paıyzǵa artty. Munyń barlyǵy daǵdarysqa qarsy is-qımyldardyń nátıjesi», - dep atap ótti Elbasy.
Elbasy jıynda jer reformasy jónindegi túsindirý jumystaryn belsendi túrde júrgizýdi tapsyrdy. «Jer reformasy jónindegi komısıa sáıkes zańnamany jetildirý boıynsha kelisilgen ustanymdy jasap shyǵýy tıis», - dedi N. Nazarbaev.
«Biz birligi berekeli eldiń yrysy mol bolaryn bilemiz. Birligi bolmaǵandyqtan, berekesi ketken, neshe jyldyq eńbegi zaıa bolyp, damýy keri qashqan qanshama elder bar. Biz solardyń qateligin qaıtalap, jurttyń tabasyna qalmaýǵa tıispiz. Álem aldynda uıatqa qalmaı, kúrdeli máseleni syndarly suhbatpen sheshe alatynymyzdy pash ete bilýimiz kerek. Bıyl Táýelsizdigimizdiń 25 jyldyq mereıli belesi. Osy kezeńde bizge syrttan kóz tigip, synaı qarap otyrǵandar kóp», - dedi Nazarbaev.
Sonymen qatar, Prezıdent memlekettik baǵdarlamalardy júzege asyrý taqyrybyn qozǵady.
«Bıznestiń jol kartasy – 2020» jobalaryna arnalǵan ınfraqurylymnyń qurylysyna bólingen qarajat ıgerilmedi. Bıylǵy 4 aı ishinde «Nurly jol» aıasynda bólingen jyldyq búdjettiń 8 paıyzy ǵana ıgerilgen», - dedi Nazarbaev.
Onyń aıtýynsha, 121 joba turaqtap tur, 13 joba problemalyq retinde qarastyrylmady. Engizilgen kásiporyndardyń barlyǵy jobalyq qýatqa ıe bola almady. Olardy ekonomıkamyzdyń qazirgi jaǵdaıy qoldady.
Ol ındýstrıalızasıanyń alty jylynyń qorytyndysy boıynsha barlyq óńirde shamamen 900 kásiporynnyń iske qosylǵanyn aıtty. Negizge kapıtalǵa quıylǵan ınvestısıalar 15 paıyzǵa ósti. Eldiń 9 óńirinde óndiris kóleminiń ósimi qamtamasyz etildi.
Jıynda oblys basshylaryna jer reformasyna qatysty jumystardy jan-jaqty túsindirý jáne Táýelsizdiktiń 25 jyldyǵynda eldiń birtutastyǵy men damýyn álemge pash etýdiń mańyzy týraly basa aıtty.
