Almaty oblysynyń Qaraoı aýlynda kópir qulady, - dep habarlaıdy Qamshy.kz.
Oblystyq tótenshe jaǵdaılar basqarmasynyń habarlaýynsha, İle aýdanynyń órt sóndirý bólimine Qaraoı aýyldyq okrýgy ákiminen búgin saǵat 9.28-te aýyl irgesinde aǵyp jatqan Qaskeleń ózenindegi kópirdiń qulaǵandyǵy týraly habarlama túsken.
Oqıǵa ornynda TJ, ákimdik, prokýratýra, taǵy basqa memlekettik organdardyń ókilderi jumys isteýde.
«Oqıǵa ornynda kópir astyndaǵy tireýdiń shaıylýyna baılanysty kópirdiń bir bóligi ornynan syrǵyp, qulaǵany anyqtaldy. Apattan zardap shekkender men qaza tapqandar joq. Bul kópir temir-beton plıtalar men tireýlerden 80 jyldary qurastyrylǵan», - deıdi Almaty oblysy İle aýdany TJB bastyǵy Anaıat Másimov.
Sońǵy kúnderi Almaty qalasy men oblysy aýmaǵynda tolassyz jaýǵan jańbyr saldarynan ózen sýlarynyń arnasynan tasyp jatqanyn esterińizge salamyz.
