«Jer kodeksine» qatysty másele áli de óz sheshimin tappaı keledi. Jer reformasy jónindegi arnaıy komısıa qurylyp, alǵashqy talqylaý otyrysyn ótkizdi. Degenmen bul komıısá músheleriniń óz aralarynda túsinispestik bolyp, keıbiri múshelikten ketip jatqanda, halyq senimine taǵy da kúdik uıalady.
El arasynda «21 mamyr mıtıńke shyǵamyz» degen áńgime tarap, ishki ister mınıstrligi Internet-keńistikti baqylaýǵa alyp, qaýipsizdik sharalaryn kúsheıti.
Bul ýaqytta qoǵam pikiri ekige jarylyp, «jer kodeksine» qarsy shyqqandar men úkimetti qoldaýshylar toby qyzý ózara pikirtalasta qaldy.
Búgin Qamshy.kz birneshe óner adamyna habarlasyp, endigi kózqarastaryn surap bildi. Al óner ıeleri endigi úmit qurylǵan jer komısıasynda ekenin alǵa tartty.
«Elmen, halyqpen birgemiz. Jer satylmaý da, jalǵa berilmeý de kerek. Oǵan azamattyq kózqarasym qarsy. Bizdiń jasymyz 40-qa keldi, endi 60-qa kelgende bala-shaǵamyzdyń kúni qalaı bolady dep ýaıymdaımyz. Jalpy, adamdardyń alańǵa shyǵyp, kóterilis bolǵanyn qoldamaımyn. Degenmen de, men óz jerimdi qorshap, tipti kórshilerimniń ruqsatsyz kirýine jol bermeımin ǵoı. Ol zańdy. Sol sıaqty jerge sheteldikterdi kirbizbeımiz. Qoldan kelgenshe jalǵa bermeýge tyrysýymyz kerek», - dedi ánshi Ómirqul Aınıazov.
Al belgili akter Bekjan Turys aıtqan pikirleriniń burmalanyp tarap jatqanyna baılanysty esh jerde eshqandaı pikir bildirgisi kelmeıtinin aıtty.
«Biz aıtqan pikirler durys jetpeı qalyp jatyr. Sondyqtan men qazir esh pikir aıtpaýǵa sheshtim. 21-ine mıtıńke shyǵamyn ba, shyqpaımyn ba, ol meniń jeke azamattyq erkim. Basqa eshteńe aıtqym kelmeıdi», - dedi Bekjan Turys.
Degenmen óner adamdarynyń arasynda qurylǵan komısıadan úmit kútip, senim artatyndar da tabyldy. Akter Baqyt Týshaev halyqty mıtıńe shyqpaýǵa shaqyrdy.
«Qazir komısıa qurylyp, bári jumys istep jatyr ǵoı. 21 mamyrda mıtıńke shyǵýdyń qajeti joq dep oılaımyn. Áliptiń artyn baǵý kerek, kútý kerek dep oılaımyn. Qurylǵan komısıa úkimettiń halyqpen sanasyp jatqandyǵynyń kórinisi ǵoı. Endigi úmittiń bári komıssá múshelerinde. Sondyqtan jurtty alańǵa shyqpaýǵa shaqyramyn, ózim de shyqpaımyn», - dedi Baqyt Týshaev.
Aıta keteıik, buǵan deıin bir top ónerdegi azamattar otandyq telearnalardyń biri arqyly atalmysh máselege qatysty óz pikirlerin bildirgen bolatyn. Sáken Maıǵazıev óz sózinde «kerek bolsa, halyqpen birge 21 mamyrda alańǵa biz de shyǵamyz» degen edi.
