Astana qalasynda 14 mamyr kúni Kásipqoı boks keshi ótkeni belgili. Diamond Ring promoýterlik kompanıasy ótkizgen keshte Grýzıa, Ózbekstan, Ýkraına, Belorýsıa men Qazaqstan syndy bes eldiń boksshylary judyryqtasty. Qazaqstan atynan Aıdar Sháribaev, Bekman Soılybaev, Berikbaı Nurymbetov, Eldos Sarqulov syndy kásipqoı boksshylar sharshy alańǵa shyqqan edi. Sol keshte óziniń kásipqoı bokstaǵy ekinshi kezdesýin ótkizip, Grýzıa boksshysy Rýben Movsesándy jeńgen Aıdar Sháribaev «Qamshy» portalyna qysqasha suhbat bergen bolatyn.

-Jeńisiń qutty bolsyn, Aıdar! Kóńil-kúı qalaı?

-Kóńil-kúı jaqsy. Astanadan Almatyǵa endi jetip jatyrmyn. Quttyqtaýyńyzǵa raqmet.

-Keshegi jekpe-jek týraly aıta otyrsań.

-Ol jekpe-jek jalǵyz men qatysqan shara emes, úoken boks keshi boldy. Ózim jattyǵatyn Diamond Ring promoýterlik kompanıasy uıymdastyrǵan Kásipqoı boks keshine bes elden boksshylar keldi. Kesh barysynda barlyǵy 8 kezdesý ótti. Onda WBC Eurasia Pacific nusqasy boıynsha chempıondyq tıtýly sarapqa salyndy.

- Bul kezdesýge qalaı shyqtyń? Kim usynys tastady?

- Bul meniń kásibı alańdaǵy ekinshi kezdesýim bolsa, Diamond Ring atynan shyqqan alǵashqy jekpe-jegim ekenin, osy rette promoýterlik kompanıa jetekshilerine, áriptes aǵalaryma alǵysymdy bildiremin.

«Diamond ring» promoýterlik kompanıasyn buryn syrttaı estip, bilip júretinmin. Atqaryp jatqan jumystary unaıtyn. Ózim Almatyda jattyǵyp júrgenmin. Bir kúni osy kompanıanyń jattyqtyrýshysy Dáýren Joldasov aǵamyz habarlasyp, ózimdi 14 mamyr kúni ótetin jekpe-jek keshinde tekserip kórýimdi usyndy. Ekeýmiz burynnan tanys bolatynbyz. Biraz boksshylardy baptaǵan, óz isiniń qas mamany. Qýana kelisip, birden Astanaǵa qustaı ushtym. Shynyn aıtsam, bul – maǵan berilip otyrǵan úlken múmkindik.

-Keshe senen jeńilis tapqan boksshy týraly da aıta otyrsań...

- Qarsylasym – Rýben Movsısán. Grýzıadan bolǵanymen, ulty armán eken. Óte tájirıbeli boksshy kórinedi. Kásipqoı boksta 36 jekpe-jek ótkizgeninen habardarmyn. Onyń 21-inde jeńiske jetip, 16-syn nokaýtpen aıaqtaǵanyn bilemin. Al, biz kásipqoı boks álemine endi ǵana qadam basyp kele jatyrmyz degendeı. Sondyqtan, buıyrtsa talaı jeńis áli alda dep oılaımyn.

-Keshegi kezdesýde sharshy alańǵa «Dúr Qamshy» ániniń súıemeldeýimen shyqqan ekensiń. Bul ándi tańdaýyńa ne sebep boldy?

-«Dúr Qamshyny» áleýmettik jelilerdiń birinen qulaǵym shalyp qaldy. Rýhty án ekenin, qazaqtyń tereń tarıhyn, búgingi bolmysyn ashatyn shyǵarma ekenin birden ańǵardym. Sodan arnaıy izdep júrip, án avtorlaryna shyqtym. Boks keshinde sóıtip, «Dúr Qamshyny» ózim qoıǵyzdym.

- Óziń aıtqandaı, bul kásipqoı bokstaǵy ekinshi jekpe-jegiń boldy. Alǵashqy aıqas qalaı ótkeni esińde me?

- Árıne, esimde. Meniń kásipqoı boksqa oıysýyma birden-bir sebepker bolǵan adam – bar qazaqtyń maqtanyshy Qanat Islam aǵam. Ekeýmiz jaqsy aralasamyz. Bir kúni habarlasyp, aldaǵy aıqasyna daıyndalyp jatqanyn, soǵan sparrıng-seriktes izdep júrgenin aıtty da, meni de ózimen birge Maıamıge shaqyrdy. Ol jaqta biraz jattyqqan soń Domınıkan elinde ótken jekpe-jek keshine qatysyp, jergilikti boksshyny úshinshi raýndta nokaýtpen jeńgenmin.

-Bokstan biraz qol úzip qalǵan da kezder bolypty. Ol myna kezdesýde kesirin tıgizbedi me?

- Otbasylyq jaǵdaılar áser etip, bokstan az-kem qol úzip qalǵan kezder de boldy. Onyń ústine, Qazaqstannan jaqsy, senimdi promoýterlik kompanıa tabylmaı, biraz júrip qaldym. Al sheteldik promoýterlermen jumys jasaǵym kelgen joq. Bálkim, taǵdyr meniń «Diamond ring ke» qosylǵanymdy qalaǵan shyǵar. Endi maǵan senim artyp, múmkindik berip otyrǵan azamattardyń úmitterin aqtaýǵa tyrysamyn.

- Suhbattsaqanyńa raqmet. Oqyrmandar atynan biz de zor jeńister tileımiz!

-Raqmet.

Eskertý: Astanada ótken boks keshindegi jekpe-jekterdiń vıdeosyn myna silteme boıynsha kóre alasyzdar.

Suhbattasqan: Erlan Tóleýbaı